Notisia

INSKRIPSHON A HABRI PA PREMIO UNESCO CURAÇAO IDIOMA MATERNO PAPIAMENTU

WILLEMSTAD – Ministerio di Enseñansa, Siensia, Kultura i Deporte (ESKD) i UNESCO Curaçao ta partisipá ku inskripshon pa nominashon di kandidato pa e Premio UNESCO Curaçao Idioma Materno Papiamentu a habrí.

Mester entregá tur nominashon na Ministerio di Enseñansa, Siensia, Kultura i Deporte di Kòrsou pa mas tardá 9 yanüari 2026. E premio pa 2026 ta kubri trabou produsí den 2025 i ku e aktividat a tuma lugá durante 2025. E nominashon mester tuma lugá pa un terser persona sea un institushon, organisashon, grupo di persona òf hurado. E kuerpo di hurado ta disidí si e nominashon akí ta bálido. E material mester a demostrá mérito ku a sobr’e salí i ku a kontribuí positivo na desaroyo di papiamentu.

UNESCO na 1999 a aprobá e Dia Internashonal di Idioma Materno i a selebrá e dia na 2000 pa promé biaha rònt mundu. Na 2003 Antia Hulandes a selebrá esaki pa promé biaha na momentu ku a instituí e premio pa Antia Hulandes pa Minister di Enseñansa i Kultura (e tempu ei). Propósito di e dia akí ta pa konsientisá tur hende tokante balor di idioma, komo un herensia ku humanidat ta kompartí i importansia di e diversidat di idioma. Na Kòrsou e premio akí ta forma parti di vários  aktividat organisá pa Gobièrnu i otronan pa alsa i stimulá idioma materno di mayoria di e poblashon di Kòrsou.

E premio ta tambe pa duna rekonosementu na institushon, organisashon, grupo òf persona den nos komunidat ku a demostrá mérito eksepshonal i logra resultado efektivo ku ta kontribuí na desaroyo di nos idioma papiamentu. Otorgamentu di e Premio aki tin tambe komo meta pa garantisá i mantené simpatia di públiko riba  tereno di idioma materno. Tur aña ta anunsiá nòmber di e ganadó(nan) di e premio riba 21 febrüari dia Internashonal di Idioma Materno.

Pa mas informashon di nominashon di kandidato tuma nota di e foyeto aki: Foyeto Premio Materno Papiamentu des 2025 final.

Por inskribí kandidato pa e premio akí for di  13 desèmber 2025 te ku 9 yanüari (inkluso) 2026 yenando e formulario den e link akí: https://forms.gle/beTCLsh2gjBD8QyU8 òf scan e kódigo OR athunto.

Ban sigui motivá nos hendenan pa sigui traha huntu na desaroyo di nos dushi idioma materno: Papiamentu ku ta e base pa formashon, ukashon i enseñansa di nos nashon.

—

KOMUNIKASHON

Ministerio di ESKD

Kódigo di QR pa inskripshon:

MAS NOTISIA

Ministerio konserní: Enseñansa, Siensia, Kultura & Deporte