Notisia

WILLEMSTAD – Ministerio di Enseñansa, Siensia, Kultura & Deporte (ESKD) ta partisipá ku den transkurso di e dianan akí lo instalá hèkinan di seguridat (dranghek) riba e ruta di karnaval di Plasa Hariri pa Cubaweg. Esaki ta sosodé den estrecho koperashon ku entre otro Ministerio di Hustisia i Ministerio di Tráfiko, Transporte & Planifikashon Urbano. Hunto komo un unidat lo hasi tur e trabou nesesario pa nos tin un karnaval sigur.

E hèkinan di seguridat (dranghek) t’ei pa manehá e multitut grandi di hende ku ta bai wak karnaval i ta pone ku por halsa e nivel di seguridat di e magno evento akí. E hèkinan di seguridat ta keda instalá prinsipalmente pa protekshon i kòntròl di kantidat grandi di hende den un evento grandi manera esun di karnaval, pa e aktividat kana ordená i strukturá. Den e siman akí (Djarason 19 pa djaweps 20) lo instalá tur e hèkinan di seguridat i alabes lo instalá diferente porta na nan pa por garantisá entrada i salida riba e ruta di karnaval. Kada porta lo keda identifiká ku un bandera kòrá i ta keda vigilá durante di marchanan.
Motibunan pa kua mester tin hèkinan di seguridat ta:
 Protekshon pa e siudadano;
 Instrumento di guia pa públiko;
 Instrumento di guia pa partisipante;
 Instrumento di seguridat (e ta evitá ku hende ta subi kaya deskontrolá i alabes evitá ku un vehíkulo por mishi ku un hende para kantu di kaya).

P’esei ta importante ku e hèkinan di seguridat tei pa yuda protehá nos pueblo karnavalista.

Ministerio di ESKD ta hasi un yamada na kada suidadano pa ban gosa di e ambiente kultural karnavalesko di un forma responsabel i positivo i na mes momentu ta hasi un petishon na pueblo di Kòrsou pa kuida nos hèkinan di seguridat, no pega nada na nan, no lèn riba nan, ni para riba e hèkinan si seguridat.

Ban gosa di un forma konsiente i sigur

—
Sra. Lizette Sambo-Velder
Direktor di Sektor di Kultura & Deporte
Ministerio di Enseñansa, Siensia, Kultura & Deporte

MAS NOTISIA

Ministerio konserní: Enseñansa, Siensia, Kultura & Deporte