WILLEMSTAD – Djamars, 7 di aprel 2026, a tuma lugá un seremonia di introdukshon na ORV pa e klasnan nobo di Penitentiaire Inrichtingswerker (PIW) i Buitengewoon Agent van Politie (BAVPOL) Politur.
E seremonia a keda moderá dor di Sra. Deborah Leito-Curiel i a konta ku diskursonan di Presidente di Direktiva di Politur, Sr. Ritzel Godfried; Direktor suplente di SDKK, Sr. Anthony Hasselmeijer; Hefe di Politur, Sr. Imro Zwerwer; i Direktora di ORV, Sra. Alpha Falbru. Hefe di detenshon di SDKK, Sr. Ludwin Maria, tambe a hiba un palabra kòrtiku, deseando e klasnan éksito ku nan formashon.
E klas nobo di PIW ta konsistí di 18 studiante, kual ta personanan ku ya ta laborando na SDKK. Esaki, ta e promé biaha ku ORV ta ofresé e opleiding di PIW, despues di un kolaborashon intensivo ku SDKK.
E klas di BAVPOL Politur ta konsistí di 8 studiante i ta e di tres biaha ku ORV ta organisá e trayekto aki, ku a wòrdu adaptá spesífikamente pa e nesesidatnan di Politur.
Tur dos klas lo sigui nan formashon den un kombinashon di voltijd i deeltijd. E trayekto di PIW lo dura 47 siman, miéntras e klas di BAVPOL Politur lo sigui un programa di 41 siman. E seremonia a terminá den un ambiente ameno, siguí pa e komienso di e periodo di formashon i integrashon pa tur dos klas. E fase aki lo dura dos siman i lo enfoká riba trabou den grupo i desaroyo di un bon harmonia entre e gruponan. Despues di esaki, e studiantenan lo kuminsá ofisialmente ku nan opleiding.
