Notisia

WILLEMSTAD – Gobièrnu di Kòrsou a disidí pa restablesé e alta representashon di Kòrsou serka Embahada Hulandes na Washington D.C.. Den e kuadro ei, Jérôme Beeldsnijder ta wòrdu detashá pa sirbi komo Minister Plenipontensiario di Kòrsou na Embahada Hulandes na Merka, desde 1 di febrüari 2026.

Ku e restablesimentu di e representashon akí, Gobièrnu di Kòrsou ke fortalesé i profundisá e relashonnan stratégiko di Kòrsou den Reino Hulandes i ku partnernan internashonal relevante. E mandato di e Minister Plenipotensiario ta enfoká riba fortalesé kooperashon internashonal i defendé e interesnan di Kòrsou den áreanan manera seguridat, desaroyonan geopolítiko, hustisia, kooperashon ekonómiko i posishonamentu internashonal.

Den e funshon akí, Jérôme Beeldsnijder lo traha, entre otro, riba:

• stimulá i intensifiká kooperashon i relashonnan internashonal;
• atendé interesnan ekonómiko di Kòrsou i identifiká oportunidatnan den un sentido amplio;
• mantené ‘netwerk’ nan stratégiko riba nivel geopolítiko pa defendé e interesnan di Kòrsou;
• sigui promové kooperashon hudisial, inkluí interkambio di konosementu, eksperensia i ekspertisio
• atendé puntonan di Gobièrnu di Kòrsou riba tereno di enseñansa, deporte i kultura, ku atenshon spesial pa e meta di promové enseñansa pagabel na Merka pa hóbennan di Kòrsou.

E presensia di un alta representashon di Kòrsou na Washington D.C. ta parti di e esfuerso mas amplio di Gobièrnu pa fortalesé e relashonnan internashonal di nos pais. Banda di Kòrsou, Aruba tambe tin un alta representashon serka Embahada Hulandes na Washington D.C., loke ta suprayá e interesnan komún den Reino Hulandes.

Jérôme Beeldsnijder ta kuminsá ofisialmente ku su trabounan na Washington D.C. riba 2 di febrüari 2026. Ku e desishon akí, Gobièrnu di Kòrsou ta reafirmá e importansia di un representashon aktivo i visibel na nivel internashonal, spesialmente na Merka, konsiderando e desaroyonan geopolítiko, ekonómiko i stratégiko ku tin influensia riba Kòrsou i e region.

MAS NOTISIA

Ministerio konserní: Asuntunan General i Promé Minister