Publiká riba 11 Desèmber 2024
Willemstad, 11 di desèmber 2024 Justitiële Zorg (JZ) a forma parti di e kampaña mundial Orange the World, di un manera eksitoso. E kampaña akí ta tuma lugá anualmente di 25 di novèmber pa 10 di desèmber pa pone énfasis riba dia internashonal pa ‘eliminá violensia kontra hende muhé i mucha’. Ku un seri di aktividat JZ a kontruibí pa krea konsientisashon i pa promové partisipashon rondó di e tema akí. JZ ta komprometé pa prevení violensia den nos komunidat. Pa e proyekto akí, e slogan ku a keda kreá ta: Orange the World ku Justitiële Zorg pa un futuro sin violensia. JZ ta traha pa protehá i fortalesé hubentut i e sistema familiar pa medio di konsientisashon, guia, kolaborashon i prevenshon.
E grupo ku tabata na enkargo pa organisá e aktividatnan a purba krea konsientisashon pa medio di kombersashon, akshon simbóliko i duna apoyo na víktimanan di violensia. JZ a invertí tempu i energia durante dos siman, apesar di e agendanan okupá, pa realisá sinku aktividat importante pa oumentá konsientisashon rondo di e tema akí.
Durante e 16 dianan di akshon, empleadonan a adaptá nan firma digital di e-mail. E adaptashon akí a yuda pa sigui plama e mensahe i hasi esaki mas visibel tokante violensia relashonal.
Empleadonan di Justitiele Zorg den kolaborashon ku Brandweer Kòrsou, a parti riba 4 di desèmber 2024, 200 blas oraño ku tekstonan di motivashon na muhénan den shèlter i na muchanan den institutonan residensial. E akshon aki tabata pa duna sósten na tur ku a risibí blas. E aktividat a kuminsá ku bishita na Ministerio di Hustisia pa hasi koleganan konsiente tokante e tema di violensia i pa inspiránan pa traha huntu pa kombatí violensia. E blasnan a keda repartí na un manera efisiente i kouteloso pa yuda krese e Orange Hope. E reakshonnan emoshonal i positivo ku JZ a haña ta konfirmá ku e inisiativa akí tabata eksitoso.
Riba 9 i 10 di desèmber 2024, e edifisio di Justitiële Zorg a keda iluminá ku koló oraño komo un símbolo di apoyo pa e lucha mundial kontra violensia.
Empleadonan tambe a keda stimulá pa durante e akshon pa bisti paña oraño komo símbolo di solidaridat. Na final premionan lo a keda repartí na e ganadornan ku e keda den e Orange Vibes. E akshon konhunto aki no solamente a yuda pa hisa e visibilidat di e kampaña pero tambe pa hisa e union den e organisashon.
E entusiasmo di e empleadonan a mustra ku nan a komprendé e urgensia di e tema i ku nan ta kontruibí pa un kambio.
E proyekto a terminá riba 10 di desèmber 2024 ku un reunion di personal, unda koleganan a duna presentashon tokante e aktividadnan ku a tuma lugá i e trabou di JZ den kuadro di violensia relashonal. Tambe un persona ku tin eksperensia riba e area di violensia relashonal a kompartí su historia, ku e meta pa krea mas komprendementu di e impakto di violensia. Na final, premionan pa e akshon di Orange Vibes a keda repartí.
Eksperensia di e grupo ku a organisá e aktividatnan
E proyekto no solamente a yuda ku konsientisashon, pero tambe tabatin un impakto tangibel den nos komunidat. E yudansa di koleganan di diferente departamento, a hasi e proyekto unu eksitoso. Huntu nos a trese e mensahe den nos organisashon tambe pafó.
JZ lo sigui invertí den prevenshon di violensia i violensia relashonal, poniendo atenshon no solamente na víktimanan, sinó tambe na e agresor. Esaki ta posibel mediante e kurso ‘Solo Kas Sigur’ ku pa aña 2025 lo keda duná na empleadonan di sektor Jeugdreclassering i otro partnernan ku JZ ta traha kuné, i ku ta duna guia na agresor.
Tur esaki no ta posibel sin e konfiansa i sósten finansiero di ‘Ministerie van Justitie en Veiligheid Nederland’
Informashon di Kontakto JZ
Bo ke sa mas di Justitiële Zorg i nos trabou? Manda nos bo petishon via meil òf sigui nos riba Facebook pa potrèt, video i mas informashon tokante nos i nos aktividadnan.
Facebook: Justitiele Zorg
Email: pr.jz@just.gov.cw
Informashon di Kontakto pa Violensia Relashonal
Pa konseho i pa mèldu kasonan tokante violensia relashonal, por tuma kontakto ku departamento Protehámi
Numbernan di telefòn
5999 663-2803 por yama i WhatsApp entre 8:00-12:00/ 13:00-17:00
0800 0080 (gratis) entre 8:00-12:00 i 13:00-17:00
5999 679-7575 (den kaso di urgensia i despues di orario di ofisina entre 17:00- 07:00)
Email: protehami.jz@just.gov.cw
