Kambio di preferensia den tráfiko na Krusada Vondelstraat i Kaya Julio Martina
Publiká riba
19 Yanüari 2024
Willemstad – Entrante 2 di febrüari lo tin un kambio di preferensia den tráfiko na krusada Vondelstraat i Kaya Julio Martina.
Servisio pa Obra Públiko (OW) ta indiká ku e kambio lo ta:
- Tráfiko ku ta sali for di e sitio di parker di winkelcentrum Brievengat, lo mester duna preferensia na tráfiko riba Kaya Julio Martina i
- tráfiko riba Vondelstraat lo mester duna preferensia na tráfiko riba Kaya Julio Martina.
E kambio aki ta teniendo kuenta ku seguridat di tráfiko i pa miho fluho di tráfiko na e krusada aki.
No ta usual ku tráfiko ku ta sali for di un sitio di parker tin preferensia. Esaki no ta kuadra ku reglanan básiko di tráfiko. Pero e situashon ta asina for di hopi tempu pasá, tempu ku Vondelstraat tabata sali riba Andres Belloweg. E tempu ei e winkelcentrum no tabata eksistí.
Lo kambia e bòrchinan di tráfiko na e krusada aki i OW lo sigui duna informashon promé ku e kambio tuma lugá pa asina outomobilistanan por antisipá riba esaki.
