Notisia

Willemstad-   Pa haña eksonerashon di uso di e sistema di kaha fiskal preskribí mester entrega un petishon pa eksonerashon.  E petishon pa eksonerashon mester a keda entrega na Minister di Finansa promé ku e último kambio den e asina yama Landsbesluit fiscale kasregistratiesystemen (P.B. 2016, 24.)  Desde e kambio di e dekreto gobernamental di medida nan general ariba menshoná, e petishon pa eksonerashon tin di ser entrega na Inspektor di Impuesto.  Ku e kambio resien den e dekreto ministerial general ku ta regla e sistema di kaha fiskal (P.B. 2016, 42) e kondishonnan na kual e petishonnan pa eksonerashon mester kumpli tambe a kambia. 

Esnan responsabel pa atministrashon, ku ya a entrega un petishon pa eksonerashon, ta haña ku drentamentu na vigor di e kambionan (P.B. 2016, 42 (30 di yüli 2016), dos luna di tempu pa kompletá nan petishon pa eksonerashon. 

Pa loke ta trata petishonnan pa eksonerashon ku a keda entrega promé ku e fecha ku e dekreto ministerial general P.B. 2016, 42 (30 yüli 2016) i ku a risibí eksonerashon, ta reglá ku e eksonerashon risibí tin un durashon di un aña.  Unabes ku e periodo di un aña vense esnan responsabel pa atministrashon mester entregá, dentro di 3 luna despues ku e aña a vense, un petishon nobo pa eksonerashon.

E petishon pa eksonerashon mester kontené lo siguiente:

1. Un bon di e sistema di kaha ku ta ser usá;
2. Un deklarashon di esun responsabel pa e atministrashon ku durante di e último 5 añanan a kumpli ku tur deber fiskal;
3. Un resúmen  di debe nan na Ontvanger di no mas ku 3 luna bieu,;
4. Un kuenta anual di e aña fiskal anterior kontrolá i sertifiká pa un akountent.  E kuenta anual mester ta kompaña pa un deklarashon di un akountent aprobá òf un asina yama “beoordelingsverklaring” aprobá. 

Den kaso ku e empresa no tabata eksistí den e aña fiskal anterior, e petishon pa eksonerashon mester tin un deklarashon di un akountent sertifiká, ku e organisashon atministrativo di e empresa por responsabilisá e entrada total di e empresa.

Inspektor di Impuesto ta duna un number di eksonerashon na e kaha den kaso ku e petishon pa eksonerashon keda konsedé.  Den kaso ku e kaha aki keda remplasá pa un otro kaha, Inspektor mester keda informá afin ku  Inspektor di Impuesto por duna e kaha nobo tambe un number di eksonerashon.

E eksonerashon ta kaduká den kaso ku Inspektor di Impuesto konstatá ku:

• E persona responsabel pa atministrashon, na momentu di a hasi petishon pa eksonerashon, a duna informashon inkorekto òf inkompletu;
• E empresario ku ta responsabel pa atministrashon, konforme lei, no a kumpli ku e deber komo pagadó di impuesto den e último 5 añanan;
• E  organisashon atministrativo di e empresa no ta di tal forma ku su datonan ta kla i transparente pa kobransa di impuesto.

Mas aleu e eksonerashon ta kaduká na momentu ku outoridatnan di kòntròl konstatá ku e organisashon atministrativo i uso di e sistema di kaha registrá no ta adekuá pa duna un bista konfiabel di e totalidat di responsabilisashon di entrada.  Den kaso ku e eksonerashon keda kaduká, e empresa mester pasa pa usa sistema di kaha fiskal.

MAS NOTISIA

Ministerio konserní: Finansa