Publiká riba 04 Febrüari 2026
Willemstad – Pa e simannan binidero trabounan di mantenshon lo bai tuma lugá na murayanan paden di e edifisio di Archivo Nashonal (Bolo di Batrei) na Scharlooweg.
E trabounan aki lo trese inkomodidat den nos edifisio te fin di februari. Teniendo kuenta ku salú tantu di nos personal komo di klientenan nos no por risibí nos klientenan den nos salanan di estudio manera kustumbrá.
Pa tòg por kumpli ku nos deber i sigui brinda servisio na nos klientenan nos lo ofresé servisio den forma digital. Klientenan por manda un e-mail ku nan petishon/pregunta na nationaal.archief@gobiernu.cw.
Nos trahadónan lo evaluá te kon leu por yuda di forma digital. Den kaso ku esaki no ta posibel lo traha un sita ku e kliente i lo duna un espasio pa sinta hasi investigashon segun nos posibilidatnan limitá.
Di antemano nos ta pidi diskulpa pa e situashon. Nos ta pidi komprenshon i indulgensia di nos klientenan. E edifisio Bolo di batrei ta e edifisio mas presioso di nos siudat i nos mester sòru pa e ta den bon kondishon pa nos por sigui risibí nos usuarionan den un ambiente agradabel.
