Publiká riba 19 Yanüari 2024
Minister di Asuntunan eksterior di Sürnam di bishita na Kòrsou di 22 pa 24 di yanüari próksimo.
Willemstad- Djaluna 22 di yanüari 2024, Minister di Asuntunan eksterior di Sürnam, sr. Albert Ramdin, ta yega Kòrsou den kuadro di un bishita ofisial riba invitashon di nos Minister di Desaroyo Ekonómiko, sr. Ruisandro Cijntje. Durante e bishitá akí, minister Ramdin lo firma un karta di intenshon huntu ku Minister Cijntje pa inisiá un trayekto di negosiashon di un pakete di akuerdonan riba e area di industria, komersio i invershon entre Kòrsou i Sürnam i tambe mas koperashon tékniko entre e paisnan riba otro terenonan relevante pa ámbos.
Otro puntonan sumamente importante ku lo konkretisá pa medio di e LOI akí ta, e intenshonnan pa realisá un kombenio komersial bilateral den forma di un akuerdo di komersio liber (Partial Scope) entre e dos paisnan i un tratado fiskal bilateral entre Kòrsou i Sürnam den estrecho koperashon ku Minister di Finansas. E bunita di e momentu akí ta ku, apesar di e relashon i lasonan históriko entre Kòrsou i Sürnam, e LOI akí ta bai ta e promé bia ku e dos paisnan ofisialmente ta bai formalisá lasonan komersial ku otro for di 101010.
Pa un tempu kaba, e sektor finansiero internashonal na Kòrsou tin hopi interes den e desaroyonan na Sürnam; entre otro den e sektor petrolero. Na luna di novèmber 2022 tabata un di e diferente okashonnan kaminda Kòrsou a tene un mishon Komersial pa Sürnam, huntu ku MEO, pa a kuminsá traha riba e lasonan pa medio di un asina yamá Suriname – Curaçao Financial Corridor lokual ta tresiendo masha hopi benefisio pa e mundu empresarial den ambos pais. Aparte di e bishita na november 2022, Ministerio di Desaroyo Ekonómiko (MEO) a organisá diferente bishita komersial pa Sürnam durante e añanan tras di lomba ku e meta pa huntu traha riba akshonnan konkreto pa stimulá entre otro mas komèrsio entre Kòrsou i Sürnam i tambe komèrsio via Kòrsou pa sobrá di region; tantu riba tereno empresarial komo tambe gobernashon. Akuerdonan manera e LOI ku lo keda firmá djamars awor, ta organisá kombersashonnan kon Kòrsou por sostené Sürnam riba tereno finansiero durante e kresementu eksponensial ku ta spera na Sürnam den e añanan benidero.
Sürnam ta un aliado komersial, sosial i kultural sumamente importante pa Kòrsou. Entre Kòrsou i Sürnam ta eksistí lasonan historiko sólido ya pa algun siglo kaba ku ta balioso pa nos keda reforsá. Mirando esaki, ta un plaser pa risibí Minister Ramdin na Kòrsou den e siman benidero i kontribuí un granito èkstra na e intenshonnan pa sigui kolaborá i koperá ku otro pa un futuro yen di posibilidat pa ámbos pais. Aparte di e firmamentu di e LOI, Minister Ramdin lo tene bishitanan di kortesia serka Gobernador, Minister President, Presidente di Parlamento i tambe diferente otro Minister i dignatario i lo tene tambe un enkuentro ku sektor Finansiero Internashonal i ku algun diaspora.
