WILLEMSTAD – Pa awe djamars 21 di mei, Servisio Meteorológiko Kòrsou ta indiká ku e situashon di wer lo por tin posibilidat pa awaseru kompaña pa welek i bos. Gobièrnu di Kòrsou ta hasi un apelashon si pa keda vigilá e pronóstikonan di tempu ku Meteo ta emití tur dia entre 5’or i 11’or di mainta i 6’or di atardi. Den kaso di posibel mal tempu Meteo lo emití un alerta.
Diferente instansia di gobièrnu ku ta forma e tim di kalamidat a reuní pa evaluá e situashon di tempu i ta keda pendiente di kualke desaroyo.
Nos ta drentando temporada di orkan ku ta kuminsá 1 di yüni i ta terminá 30 di novèmber. Kada siudadano por tuma akshonnan di prekoushon na kas. Di e forma akí nos ta bon prepará pa kualke eventualidat.
Servisio Meteorológiko di Kòrsou lo sigui vigilá e desaroyo di nos wer i lo informá si esaki bira nesesario.