Notisia

Kolegio Erasmo ta será dia 16 di mei 2025 i petishon relashoná ku prueba di EFO

WILLEMSTAD – Minister di Enseñansa, Siensia, Kultura i Deporte sr. Sithree van Heydoorn riba konseho di Slachtofferhulp, tim di guia eksterno di SIGE i den konsulta ku e direktiva di Fundashon Skol Humanista na Papiamentu (FSHP), a disidí pa tene Kolegio Erasmo será riba djabièrnè 16 di mei.

E desishon aki a keda tumá teniendo kuenta ku e estado di ánimo di personal i alumnonan na e skol, esaki relashoná ku e fayesementu trágiko di un alumno. E desishon aki ta duna e ekipo di enseñansa na e skol espasio pa traha riba e situashon aki i prepará nan mes ku e tim di ayudo pa di un forma apropiá risibí e studiantenan ora nan regresá skol bèk djaluna 19 di mei próksimo.

Ademas, minister ta partisipá ku den konsulta ku direktiva di FSHP, minister a aserká komishon di EFO i e Ministerio di ESKD ku e petishon pa no kontinuá ku EFO na e skol i laga e rapòrt di desaroyo (onderwijskundig rapport), sirbi komo base pa aseptashon di e alumnonan aki na enseñansa sekundario pa e aña eskolar 2025-2026. E petishon aki a keda hasí den kuadro di e sirkunstansia eksepshonal na e skol.

Minister sr. Sithree van Heydoorn i su ministerio ta kombibí ku e tristesa di personal i alumnonan di Kolegio Erasmo i ta deseá nan forsa i konsuelo den e tempu difísil aki.

—

Sr. Sithree van Heydoorn

Minister di Enseñansa, Siensia, Kultura i Deporte

MAS NOTISIA

Ministerio konserní: Enseñansa, Siensia, Kultura & Deporte