Publiká riba 21 Novèmber 2019
WILLEMSTAD – Riba 18 novèmber un delegashon kombiná di e Organisashon di Refugiado di Nashonnan Uní (UNHCR) i e Organisashon Internashonal pa Migrashon (IOM), a bishitá Promé Minister Rhuggenaath i Minister Girigorie di Hustisia. Meta di e bishita tabata pa kontinuá ku e kombersashonnan tokante di e.o. e akshon riba fluho di migrashon i pa sigui traha riba e relashon mutuo.
E organisashonnan a primintí atrobe pa sostené gobièrnu di forma ku por yega na un solushon pa e problema kompleho di e krísis Venezolano pa Kòrsou. Ademas, nan a enfatisá e importansia di e aserkamentu regional komun i interkambio di informashon.
Tantu Chiara Cardoletti, representante regional interino di Nashonnan Uní i área di Karibe pa UNHCR komo Robert Natielo, kordinadó regional pa área di Karibe di IOM, a gradisí e ministernan pa e bon koperashon aktual i a ekspresá e deseo di por kontinuá esaki.
