Publiká riba 19 Ougùstùs 2025
E konferensia a trese huntu mas di 30 oradó, ripartí riba 20 lokalidat spesial den Skarlo. Diferente organisashon a habri nan porta pa risibí maestronan, lidernan di skol i personal di sosten, pa tayernan ku ta duna nan un bista nobo i hèrmèntnan práktiko pa e aña eskolar 2025/2026. E dia ei a kambia e lokalnan konosí pa luganan yen di energía, perspektiva nobo i hospitalidat kaluroso.
E dia a kuminsá di un forma espektakular ku un apertura plenario den kurá di DOS, kaminda un MC virtual a interaktá ku un MC bibu. Huntu nan a sòru pa un komienso dinámiko i energétiko ku muzik, humor i palabranan inspirativo pa duna bida na e tema di e dia, ‘DOS den Balansa: e hende i kontenido’. Partisipanten a bishitá den gruponan chikitu, diferente tayer interaktivo ku a varia di desaroyo di kontenido pa materia spesífiko te desaroyo personal profundisá, ku atenshon spesial pa didáktika di idioma komo yabi pa igualdat di oportunidat den e konteksto multilingual di Kòrsou.
Ku e konferensia inisial aki, DOS a demostrá ku rekapasitashon no ta toka solamente konosementu i abilidat, sino tambe konekshon, inspirashon i balorashon di e personanan ku ta hasi e diferensia kada dia di nobo den e mundu di enseñansa.
Palabra di direktor di DOS, sra. Nihayra Leona: “Awe nos a eksperensiá huntu kiko ta e forsa di siña pafó di e lugá konosí i topa ku otro. Danki na e sosten di nos partnernan i e hospitalidat di tantu organisashon, nos por a kuminsá nos aña eskolar den balansa, ku energia i un mishon komun.”
E konferensia inisial 2025 di DOS no tabata solamente un dia pa siña, sino tambe pa selebrá ku enseñansa ta e base ku ta sòru pa futuro di nos isla i esei ta kuminsá ku profeshonalnan inspirá i motivá den enseñansa.
—
KOMUNIKASHON
