Publiká riba 07 Òktober 2025
WILLEMSTAD – E Konferensia Regional di Embahadornan di Hemisferio Oksidental a kuminsá ofisialmente ayera na Kòrsou. E enkuentro akí ta trese e embahadornan i kònsùl generalnan di Reino huntu ku ta sirbi den paisnan den hemisferio oksidental.
Durante e konferensia, ku ta tuma lugá di 6 te ku 9 di òktober 2025, lo trata temanan aktual manera desaroyonan geopolítiko, seguridat, kambio klimátiko, koperashon regional i perspektiva ekonómiko.
E nochi di apertura a wordu marká ku un ‘welcome cocktail event’, organisá pa Direktorado di Relashonnan Eksterior di Kòrsou, kaminda sra. Darrillyn van der Veen, Direktora di Direktorado di Relashonnan Eksterior, i sra. Marjan Kamstra, Direktora di Direktorado di Hemisferio Oksidental, a tene palabra pa tur hende presente.
Promé Minister Gilmar Pisas a dirigí su diskurso na e invitadonan i a enfatisá e importansia di koperashon den Reino Hulandes i ku paisnan den region.
Na fin di su diskurso, Promé Minister Pisas huntu ku Minister Middelhof a entragá un regalo simbóliko na tur embahadornan i kònsùl generalnan, komo un muestra di apresio pa nan dedikashon i kompromiso.
E konferensia lo kontinuá durante e dianan siguiente ku vários seshon i bishitanan di trabou, bou di direkshon di Direktorado di Hemisferio Oksidental di Ministerio di Asuntunan Eksterno di Reino Hulandes, den kolaborashon ku Gobièrnu di Kòrsou.
Klik aki pa lesa e diskurso di Promé Minister Pisas na hulandes.
