WILLEMSTAD – Djamars dia 27 di febrüari 2024, ‘Veiligheidheidsdienst Curaçao’ (VDC) huntu ku ‘Directie Risicobeheersing en Rampenbeleid’ (DRR) di Ministerio pa Asuntunan General (AZ), ta organisá un kongreso riba e tema Seguridat Nashonal den Renaissance Hotel. Riba e dia akí lo para ketu i amplia riba e riesgonan ku por forma un menasa pa pais pero tambe den Reino Hulandes. Alabes lo para ketu na e riesgonan ku por asotá Kòrsou ku ta prosedente di otro paisnan, pero ku por tin su impakto na Kòrsou. Alabes di análisisnan hasí a konstatá ku Kòrsou konosé mas riesgonan ku solamente riesgonan tradishonal manera un orkan, laman brutu òf inundashon. E riesgonan ku por asotá Kòrsou ta enfatisá e importansia di e suministro di informashon tokante e menasanan ku por asotá Korsou i kon sektornan vital di pais ta prepará pa esaki. Ta importante pa haña un bista kon di un banda komunidat ta prepará pa pa eventual riesgonan i di e otro banda kon instansianan vital ta prepará pa mitigá efektonan ku e riesgonan akí por trese kuné.
Ministerio di Asuntunan General enkargá ku e.o. seguridat nashonal konhuntamente ku organisashonnan manera VDC i DRR, ta enkargá pa implementá e lei i maneho pa seguridat nashonal. Debí na e responsabilidat akí i e importansia di e tópiko akí a tuma stapnan pa organisá e promé kongreso nashonal di seguridat. Meta di e kongreso akí ta pa tende tambe di e sektornan konserní i komunidat kon nan ta mira e riesgonan ku ta/por menasá nos seguridat nashonal.
Durante e kongreso lo elaborá huntu ku partisipantenan riba e riesgonan idenfiká den e profil di riesgo di Reino Hulandes, e asina yamá: ‘Rijksbrede Veiligheidsstrategie 2023-2028’ i tambe profil di Kòrsou ku yama ‘Risicoprofiel Curaçao’. E profil di riesgo di Kòrsou por yuda duna un bista mas amplio di e riesgonan ku por asotá Kòrsou.
E kongreso nashonal di seguridat lo dura hinter dia i ta dividí den dos parti. Parti mainta lo tuma lugá e seshon ku ‘stakeholders’ ku a ser pre-identifiká i invitá, pa asina profundisá riba kon nan ta mira e menasanan i riesgonan presente na Kòrsou. Parti mèrdia lo tuma lugá e seshon ku públiko general, pa asina haña un bista di pueblo riba e tema di menasanan pa nos seguridat nashonal. Mirando ku e interes pa e kongreso ta hopi haltu i e kapasidat di sala ta limitá, e parti mèrdia ta solamente pa e públiko ku ya a registrá delantá i a risibí un konfirmashon ku nan lo por ta presente na e kongreso.
Interesadonan por lesa mas tokante e ‘Veiligheidsstrategie’ di Reino Hulandes riba: https://www.nctv.nl/onderwerpen/veiligheidsstrategie-voor-het-koninkrijk-der-nederlanden
Direktorado di Komunikashon i Informashon di Gobièrnu lo emití un komunikado despues di e kongreso i lo amplia mas tokante e tópiko akí durante un edishon di “Gobièrnu na plaka chikí”.
