Notisia

Djadumingu 4 di mei 2025, ta konmemorá víktimanan di Segundo Guera Mundial

riba e Dia di Sakrifisio Patrimonial, ‘Dodenherdenking’.

WILLEMSTAD – Djadumingu 4 di mei, durante un seremonia sòlèm na monumento di Segundo Guera Mundial “Monument der Gevallenen” na Waaigat, ta konmemorá esnan ku a pèrdè nan bida den Segundo Guera Mundial. Riba e fecha akí ta duna rèspèt na i rekordá tur militar i sivil ku durante temporada di guera, mishonnan di pas di organisashonnan internashonal òf na man di teroristanan, a bin pèrdè nan bida. Gobièrnu di Kòrsou, Marina Real, VKC, Scouting Antiano, Brigada di Seguridat, SMEC, KPC, veteranonan, komunidat Hudiu i famianan di esnan ku a pèrdè nan bida durante Segundo Guera Mundial kada aña ta bini huntu pa konmemorá e echo aki.

Esaki ta tuma lugá durante un seremonia sòlèm na e “Monumento di Víktimanan di Segundo Guera Mundial” na Waaigat i na Santana Militar na Roodeweg den Otrobanda. E seremonia na Waaigat ta kuminsá 9:00or di mainta i ta habrí pa públiko. Durante e seremonia tin posibilidat pa famia i esnan ku ta deseá pone flor. Na Santana Militar na Roodeweg, tambe tin un seremonia ku ta kuminsá 10:30.

E akto di 4 di mei dia di Sakrifisio Patrimonial, pa konmemorá e víktimanan di Segundo Guera Mundial ta unu di sumo importansia, pa motibu ku den lus di sustu i tristesa kousá pa Segundo Guera Mundial komunidat internashonal a disidí ku ningun hende, hamas, mester falta
‘E Derecho di tin Derecho’. Pa duna forma moral i forsa legal na esaki, a buta balor humano den palabra i ankrá esaki den e derechonan fundamental di hende.

—

KOMUNIKASHON

MAS NOTISIA

Ministerio konserní: Enseñansa, Siensia, Kultura & Deporte