Publiká riba 30 Òktober 2025
Willemstad – Djárason 29 di òktober 2025, Konseho di Minister a risibí bishitá di e Komishon Independiente di Evaluashon pa Aruba, Kòrsou, Sint Maarten. For di aña 2021, a base di e Areglo Mutuo pa Koperashon riba Reformanan, Aruba, Kòrsou i Sint Maarten ta implementá reformanan den sektor públiko ku sosten di Hulanda.
E reformanan ta ser ehekutá pa medio di un pakete di pais pa kada un di e paisnan Aruba, Kòrsou i Sint Maarten. E paketenan di pais aki ta kategorisá e reformanan den vários tema, entre nan maneho finansiero i impuesto, organisashon di gobièrnu, desaroyo ekonómiko, seguridat sosial, salubridat, edukashon i hustisia. Pa pais Kòrsou, Promé Minister di Kòrsou i alabes Minister di Asuntunan General, sr. Gilmar Pisas, ta kordiná e ehekushon di e reformanan dor di e ministernan i nan departamentonan. Promé Minister ta keda asistí den esaki dor di e Komishon Nashonal di Reforma (NHC) di Gobièrnu di Kòrsou, presidí pa sr. Caryl Monte.
Konforme e Areglo Mutuo dia 1 di sèptèmber último un Komishon Independiente di Evaluashon a keda instituí dor di e Ministernan di Asuntunan General di Aruba, Kòrsou i Sint Maarten i e Minister di Asuntunan Interior i Relashonnan den Reino (BZK). Tarea di e Komishon aki ta pa traha un rapòrt di evaluashon riba ehekushon di e Areglo Mutuo na Aruba, Kòrsou i Sint Maarten, teniendo kuenta ku práktikanan lokal den kada pais.E Komishon ta konsistí di sra. Maria van der Sluijs-Plantz (presidente), sr. Angel Bermudez (representante di Aruba), sr. Francis de Lanoy (representante di Kòrsou), sr. Cees Slager (representante di Hulanda), i sr. Franklyn Richards (representante di Sint Maarten).
Riba djárason, 29 di òktober, e Komishon Independiente a bishitá NHC i Konseho di Minister di Kòrsou. Durante e bishita a trata e mishon di e Komishon i e proseso di evaluashon. E rapòrt di e evaluashon lo keda entrega na e Promé Ministernan di Aruba, Kòrsou i Sint Maarten i na Minister di BZK promé ku 1 di mart 2026. E konklushonnan di e evaluashon lo forma un base importante pa tomo di desishon dor di e gobièrnunan di e paisnan pa loke ta trata un posibel kontinuashon, kambio òf terminashon di e Areglo Mutuo, i tambe pa e kontenido i diseño di e koperashon entre e paisnan den futuro. 
