Publiká riba 02 Aprel 2026
Willemstad – Djárason, 1 di aprel 2026, Konseho di Minister a risibí bishita di e Kordinadó Residente di Nashonnan Uní pa Trinidad & Tobago, Aruba, Kòrsou i Sint Maarten, señora Joanna Kazana-Wisniowiecki i su delegashon.
E bishita a konsistí di un presentashon i diálogo stratégiko kaminda a para ketu na e sistema di koperashon ku Nashonnan Uní tin ku Kòrsou i alabes agentenan di Nashonnan Uní ku aktualmente ta trahando na Kòrsou. Un di e metanan prinsipal tabata pa identifiká prioridatnan ku Kòrsou tin aktualmente komo pais i kon e Nashonnan Uní i su agensianan por traha huntu i duna un aporte na realisashon di e prioridatnan di pais Kòrsou.
Durante e presentashon a pasa brevemente riba diferente trayekto pa loke ta salubridat, enseñansa, uso di Inteligensia Artifisial, igualdat i migrashon. Sra. Kazana-Wisniowiecki a remarká ku Kòrsou ta sobresalí komo pais ku ta tuma edukashon i salubridat na serio i ku Kòrsou tin un bon sistema pa loke ta maneho i seguridat di su frontera. Durante di e kòmbersashon e representante di Nashonnan Uní a felisitá Minister Shalten Hato di Hustisia i Minister Charetti America-Francisca di Desaroyo Sosial, Labor i Bienestar (SOAW) ku inisio di e trayekto ‘Rib’é Lugá’ i e Konferensha di Prensa kaminda a kompartí hopi informashon balioso tokante e trayekto di registrashon i legalisashon di indokumentadonan.
Promé Minister Pisas na su turno a para ketu na e Plan di Gobernashon di Gabinete Pisas III i e ‘Sustainable Development Goals (SDG’s)’ ku Kòrsou ta bai enfoká riba dje den e ‘Agènda 2030’. Esakinan ta entre otro kombatí probresa ekstremo, inigualdat, inhustisia i kambio di klima.
Por último sra. Kazana-Wisniowiecki a enfatisá riba e diferente oportunidatnan ku Kòrsou tin pa hasi uso di e ekspertisionan presente den Nashonnan Úni pero tambe e diferente agensianan ku ta forma parti di e organisashon.
Sra. Joanna Kazana-Wisniowiecki a ser akompañá pa e siguiente representantenan di Nashonan Uní: Tracey Hutchinson (‘Head of Office of the United Nations Resident Coordinator), Christelle Parris-McKay (‘Data Management Officer’) i Mark Thomas (‘Partnerships & Development Finance Officer’), i tambe Karen Wouters (‘Project Coordinator for Curaçao’, International Organization for Migration (IOM)).
