Publiká riba 18 Desèmber 2025
WILLEMSTAD – Konseho di Minister a akordá pa e órgano bai ku un periodo kòrtiku di resès na fin di desèmber 2025. Resès ta un periodo akordá kaminda no ta tene e reunionnan semanal di Konseho di Minister. Esaki ta brinda e Ministernan e oportunidat, tempu i espasio nesesario pa enfoká riba nan propio ministerio i e trabounan ku tin di atendé.
Ta bon pa enfatisá ku gobernashon di pais ta sigui normal durante e periodo di resès akí. Den kasonan nesesario por tuma, konforme e prosedura, un desishon “op stuk”. Esaki ta nifiká ku e dokumentonan ku informashon nesesario i relevante ta pasa di kantor di un minister pa e otro, pa asina haña aprobashon di e mayoria.
E periodo di resès no ta un temporada di vakashon, pero un mandatario por skohe – den konsulta – pa bai ku vakashon. Den un kaso asina e minister lo keda remplasá temporalmente pa e minister ku ta represent’é durante di su ousensia.
E periodo di resès ta kuminsá dia 18 di desèmber 2025, kual ta nifiká ku e último reunion planiá ta riba djárason, 17 di desèmber 2025. E promé reunion despues di resès lo ta riba djárason, 14 di yanüari 2026.
Komo ku Konseho di Minister ta bai ku resès, ta importante pa komunidat i tambe e aparato públiko ta informá riba esaki. Den kaso di ámtenarnan, ta bon pa kada un empleado públiko ta na altura di e prosedura, tantu promé komo durante di un resès. Di e forma akí kada ministerio por prepará adelantá di forma ku dokumentonan importante ku mester di desishon di Konseho di Minister, ta keda atendé na tempu.
Pa mas informashon tokante Konseho di Minister i e desishonnan ku ta keda tumá durante reunionnan semanal, por bishitá www.gobiernu.cw i klek riba ‘Desishonnan Konseho di Minister’.
