Publiká riba 25 Febrüari 2026
Willemstad – Djárason, 25 di febrüari 2026, Konseho di Minister a risibí bishita di Kolegio di supervishon finansiero (Cft). Durante su presentashon den e reunion regular ku Konseho di Minister di Kòrsou, sr. Hans Hoogervorst, presidente di Cft, a duna di konosé ku nan ta kontentu ku aspektonan finansiero di Kòrsou. Tambe e kolegio ta positivo di e kresementu enorme den ekonomia di Kòrsou.
Segun Cft e kresementu ekonómiko ta bisto den turismo i su impakto positivo. Cft a mustra si riba e impaktonan negativo tambe ku por surgi i e importansia pa tene kuenta ku esaki. Aspektonan di migrashon, segun Cft, por tin impaktonan demográfiko riba komunidat i ta importante pa analisá e situashonan aki na tempu. Tambe Cft ta mustra riba e importansia pa sigui traha riba un surplus finansiero, pa asina por atendé ku situashonnan di atenshon ora esakinan presentá.
Den nan presentashon Cft a mustra ku gastunan di kuido médiko na Kòrsou ta keda e peso mas grandi riba pais su presupuesto. Cft a suprayá importansia di un plan pa manehá finansa konforme prioridatnan, no solamente pa kuido pero pa tur área i ministerio.
Cft su punto di preokupashon mas grandi ta pa Servisio di Impuesto. Aki ta trata no solamente e aspekto di integridat pero tambe e retrasonan finansiero, ku no ta kanando ku e tèmpo sufisiente haltu. Ta importante pa atendé ku esaki pa krea espasio pa por ehèmpel baha algun tipo di impuesto.
Segundo Vice Promé Minister Cooper, alabes minister di Finansa, a indiká ku despues di e reunion entre Ministerio di Finansa i Cft e dia anterior, e mesun atardi su tim a reuní ku e timnan di maneho di Servisio di Impuesto i Ontvanger pa tuma algun akshon konkreto.
Por último, sr. Hoogervorst a duna di konosé ku pronto Cft lo presentá un kuadro di evaluashon ku ta bai kontribuí na mehorá maneho finansiero di e islanan.
Sr. Hoogervorst a ser akompañá pa sr. Paul Hilbers (Miembro nominá pa Hulanda), sra. Elizabeth de Cuba (Miembro nominá pa Kòrsou), sra. Julisa Frans (Miembro nominá pa St. Maarten), sr. Jeroen Tellings (Konsehero), sra. Jasmijn Kossick (Konsehero), i sr. Han van Midden (Sekretario).
