Publiká riba 24 Sèptèmber 2025
WILLEMSTAD – Djárason 24 di sèptèmber 2025, Konseho di Minister a risibí bishita di Hunta di Supervishon Finansiero (Cft). Durante e reunion regular akí Presidente di Cft, sra. Lidewijde Ongering, a duna un presentashon den kual a trata brevemente e konsepto di presupuesto pa 2026. Tópiko prinsipal di e bishita, sinembargo, tabata kuido médiko nashonal i e preshon finansiero ku e sektor akí ta pone riba kaha nashonal.
Durante e presentashon a trata algun asuntu klave, inkluso uso di kuido primario, kapasidat di laboratorio i e prevalensia haltu di kondishonnan króniko manera diabétis tipo 2 i obesidat. A enfatisá ku prevenshon i efisiensia den kuido di salú por kontribuí na kontrol di gastu. Finalmente, Cft a rekomendá un kantidat di posibel medida ku por tin un impakto positivo.
Vise Promé Minister Javier Silvania, kende tambe ta Minister di Finansa i Minister di Salubridat Públiko, Medio Ambiente i Naturalesa (GMN), a indiká ku Ministerio di GMN aktualmente ta implementá vários trayekto di maneho ku ta enfoká entre otro riba prevenshon, suministro di informashon i un estilo di bida saludabel.
A palabrá ku den un siguiente reunion mas informashon lo wòrdu kompartí cu Cft tokante e inisiativanan andando i medidanan proponé pa fortifiká kuido di salú riba término largo i mihó maneho di gastunan.
Sra. Ongering a wòrdu akompañá pa sr. Hans Hoogervorst (Miembro nominá pa Hulanda), sra. Elizabeth de Cuba (Miembro nominá pa Kòrsou), sra. Fleur Brouwers (Secretario ad interim di Hunta di Supervishon Finansiero), sr. Jeroen Tellings (Konsehero) i sr. Elmer Pals (konsehero).
