Kontrato di ’11th EDF WORKS contracts’ aprobá ofisialmente pa EUD
Publiká riba
23 Òktober 2024
Willemstad – Gobièrnu di Kòrsou ta kontentu di por anunsiá ku kontrato di ’11th European Development Funds (EDF) WORKS contracts’ a wòrdu aprobá ofisialmente pa Delegashon di Union Europeo (EUD). E logro aki ta marka un paso importante pa kontinuashon di e kolaborashon entre Kòrsou i Union Europeo den desaroyo di proyekto di infrastruktura esensial riba nos isla.
Proyektonan ku ta parti di e programa aki ta:
Otrobanda:
Den Breedestraat Otrobanda, Roodeweg i e bario banda di e moské, lo kambia e sistema di riolering. Aktualmente tin un sistema meskla, ku ta nifiká ku awa sushi I áwaseru ta bai huntu. E sistema nobo ta pipanan separá. Pues e awa sushi ta bai apart den e sistema di purifikashon di awa, i awa di áwaseru ta bai laman
Plenchi pòmp di gasolin Scheidelaar:
Den e proyekto aki tambe, ta drecha e plenchi na haltura di pòmp di gasolin Scheidelaar. Lo pone klenku, banki, speeltoestellen.
Tera Kòrá:
Ta bai traha un sistema di purifikashon di awa nobo, ultra moderno. E sistema eksistente a kima basta aña pasa.
Sapaté:
E bario banda di “Nos Welita”. Ta bai drecha e iluminashon públiko i ta hala e kapa di asfalt. Durante e 10 proyekto di EDF, a traha un sentro di bario. Den e 11 EDF aki, ta bai finalisá e bario dor di hala e kapa di asfalt i pone iluminashon públiko
Fortuna ariba:
FKP ta bai traha kas pa pueblo i VVRP ta bai traha e infrastruktura, kual ta enserá riolering, klenku i kaminda di asfalt.
E aviso ta publiká den diferente korant lokal i den EU su ‘Official Journal’ (TED), i riba e ‘Funding & Tenders Portal’ via e siguiente link: https://ec.europa.eu/info/funding-tenders/opportunities/portal/screen/home. E publikashon lo inkluí e ‘Contract Notice’, ‘Additional Information to the Contract Notice’, pa asina e dokumentashon ta kompletu.
E último fecha pa entrega e oferta pa esaki ta fihá riba 31 di yanüari 2025.
E desaroyo aki ta un resultado di esfuerso komun di tur partidonan envolví i ta reflehá e kompromiso i trabou duru ku a invertí den e proyekto aki. Aprobashon di e dosier di kontrato ta duna un ‘boost’ importante pa Kòrsou i ta habri kaminda pa realisashon di diferente proyekto di infrastruktura ku lo tin un impakto positivo riba e isla.
Aunke tin mas trabou pa hasi, e meta aki ku nos a yega ta un logro grandioso. Minister Charles Cooper di Ministerio di Tráfiko, Transporte i Planifikashon Urbano ta spera ku plaser pa kontinuá kolaborashon ku aktor lokal i internashonal pa yega un fin eksitoso ku e proyekto aki.
