Willemstad – Bou di e bandera di Actiecentrum Ondermijning Curacao (ACOC), Kuerpo Polisial Kòrsou (KPC) i diferente instansia, a realisá un otro eksitoso serie di kontrolnan multidisiplinario dia 28 di novèmber. E kontrolnan akí a tuma lugá na dos garashi den area di Montaña, i tambe na vários establesimentu di horeka.
Vários instansia tabata presente na e inspekshonnan akí, entre otro Kuerpo Polisial Kòrsou, GMN (Toezicht en Handhaving), FIU, Ministerio Públiko, ROP, SBAB, Aqualectra, Inspekshon di Labor di SOAW, Inspekshon di MEO i PATH Kòrsou .
Durante e inspekshonnan a tuma nota di vários violashon di lei serka e establesimentunan, entre otro, no ta registrá na Kámara di Komersio, infrakshon den kuadro di lei di impuesto, no ta registrá na FIU, hòrtamentu di koriente, no ta den poseshon di un Hindervergunning i dor di tin personanan indokumentá den empleo, E resultadonan akí ta enfatisá e nesesidat di kontrol kontinuo i koperashon entre diferente instansia paden i pafó di gobièrnu. Vários atvertensia a ser emití. Algun kompania mester a sera nan portanan inmediatamente. Path Kòrsou a papia ku e personanan indokumentá pa señalnan di eksplotashon laboral i a haña un ‘meldplicht’ dor di KPC.
ACOC i Kuerpo Polisia Kòrsou ta pone énfasis riba e importansia di e kontrolnan integral aki i lo sigui realisá nan den futuro. ACOC ta un organisashon ku ta kai bou di Ministerio di Hustisia i ta komprometé su mes na un aserkamentu integral i atministrativo pa kombatí krimen ku ta debilitá nos komunidat, den kua koperashon entre partnernan paden i pafó di gobièrnu ta sentral.
