Publiká riba 25 Aprel 2024
Den oranan di mainta di djaweps, minister di Hustisia, mr. Shalten Hato huntu ku direktor statutario di Curaçao Airport Partners (CAP), sr. Johnny Andersen a firma un protokòl di koperashon mutuo pa kolaborashon riba tereno laboral di Brantwer Kòrsou, Brantwer na aeropuerto i tambe Kuerpo Polisial Kòrsou. Ku e koperashon entre e 3 entidatnan aki lo brinda un servisio di bombero di haltu kalidat i efisiente, i seguridat riba Kòrsou. Esaki ta wòrdu logra dor di hasi akuerdonan tokante asistensia mutuo, parti konosementu, formashon i entrenamentu, ehersisio konhunto i direktivanan pa kompra material.
Brantwer Kòrsou, Kuerpo Polisial Kòrsou i CAP ta hasi tur kos posibel pa stimulá un koperashon firme riba tantu e tereno pa kombatí kandela, pero tambe di òrdu públiko i seguridat. Ehekushon di kooperashon Lo t’ei wòrdu ahustá strukturalmente tokante progreso di e akuerdo aki. Kooperashon lo ta enfoká, entre otro: Pa yega na asistensia mutuo, definishon di área di trabou, prosedura di notifikashon, kontaktá personanan i preparashon di funshonarionan di servisio disponibel lo ta detayá den un akuerdo detayá entre Komandante di Bombero, Hefe di Kuerpo Polisial KPC i funshonario kualifiká di CAP.
E protokòl aki ta duna posibilidat pa kompartí entrenamentu bou di e koleganan di Brantwer ku otro, pero tambe entre koleganan di KPC i Curaçao Airport Police. Lokual tantu Curaçao Airport Partners i tambe Ministerio di Hustisia a firma pe tambe den e protokòl aki, ta pa risibí e disponibilidat di ofisinanan, klasnan i fasilidatnan tékniko pa entrenamentu entre e bomberonan. Esaki na momentu di ehersisio mono, pero tambe ehersisio multidisiplinario riba fechanan stipulá na aeropuerto i otro tereno. Mas aleu, e protokòl ta duna espasio tambe pa tantu Brantwer Kòrsou, Brantwer di Hato i tambe Kuerpo Polisial Kòrsou por interkambiá di personal, interkambiá di material i ekipo, por hasi evaluashon i yega na ekiponan grandi mutuo, pero tambe ta duna amplio posibilidat pa interkambio di personal riba diferente tereno.
Na final di e mainta, tantu Minister Shalten Hato i Johnny Andersen di CAP, a indiká di ta satisfecho ku porfin a yega na un protokòl nobo entre Ministerio di Hustisia i CAP, mirando ku e ultimo tabata data for di 2002, i ku ámbos partido ta spera riba un koperashon estrecho pa yega na resultadonan satisfaktorio.