Publiká riba 01 Desèmber 2025
Willemstad – Den un programa intensivo siman pasá, mas ku 100 mènedjer di krísis i spesialista di komunikashon di krísis di tur parti di Reino a reuní na Kòrsou pa e di 6 edishon di Siman di Maneho di Krísis i e di 2 edishon di Siman di Komunikashon di Krísis. Durante di e siman aki, partisipantenan a kordiná nan métodonan di trabou pa mehorá kolaborashon durante insidente, kalamidat i krísisnan.
Tambe a trata susesonan aktual, manera e situashon geopolítiko den nos region. Maske ku aktualmente no tin menasa direkto pa e islanan, tabata na su lugá tòg pa a trata posibel senarionan i preparashonnan konhunto. Meskos ku ta hasi tambe pa riesgonan di tempu ekstremo manera e posibel pasada di orkan. Walter Hansen, Komandante di Marina den Karibe tabat’ei presente i a partisipá den un diskushon di pènel ku e kordinadónan di krísis di Kòrsou, Aruba, i Boneiru durante siman. E Komandante a presentá e punto di bista di Departamentu di Defensa riba e situashon aktual den e region.
Ekspertisio lokal klave riba bista i konsiderashonnan relashoná ku maneho di krísis i komunikashon di krísis tambe a ser trese dilanti durante e siman aki pa entre otro Albert Martis (Perspektiva Regional riba Kambio di Klima), Valerie Martens-Monier (E Importansia di registrá Herensia Kultural riba mapa) i Pedzi Girigorie (Klima, Kalor i Naturalesa). Matthijs van Amelsfort, direktor di Nederlandse Nationaal Cyber Security Centrum (NCSC) a duna un diskurso prinsipal tokante e importansia di resiliensia sibernétiko pa e parti Karibense di Reino.
Un paso klave ku Direktorado pa Kòntrol di Riesgo i Maneho pa Kalamidat di Kòrsou (DRR), komo ko-organisadó di e Siman a kompartí ku e partnernan di Reino tabata presentashon di e Sentro di Krísis nobo i e Sentro di Konosementu asosiá, COC3. A establesé e fasilidatnan aki pa sirbi komo un punto di koordinashon sentral pa krísis i desasternan lokal, pero tambe komo un ‘hub’ stratégiko pa henter Reino. Durante e ‘sneak peak’ miembronan di e Organisashon lokal di Protekshon di Krísis i Kalamidat (CRBo) tambe tabat’ei presente.
Durante e siman di krísis tambe a duna un aktualisashon tokante e aktividatnan di e plataforma di kolaborashon ‘Caribbean Civil Protection Mechanism’ (CCPM), inkluso e grupo di ofisialnan di krísis ku por usa ampliamente den e parti Karibense di Reino, i e próksimo entrenamentu ku partnernan di krísis na Sint Maarten. Pa medio di konosementu, kapasidat i rekursonan kompartí nos ta oumentá resiliensia kolektivo denter di Reino i pafó di dje.
Siman di Maneho di Krísis i Komunikashon di Krísis a konkluí ku un rekorido edukativo den kayanan di Otrobanda pa kortesia di Ofisina di Turismo di Kòrsou. E siguiente edishon konhunto di e siman kombiná aki, lo tuma lugá den novèmber 2026, probablemente na Sint Maarten.
