Publiká riba 21 Mart 2019
WILLEMSTAD – Riba invitashon di Embahador di Reino na Panamá, Sr. Dirk Janssen, Promé Minister Rhuggenaath a guia e mishon di komersio di Reino di 17 pa 20 mart na Panamá. E mishon di komersio ta mará na e Konferensia Marítimo di Panamá XIV.
Den e mishon di komersio a partisipá 16 negoshi for di Hulanda, Aruba i Kòrsou, di kual mitar ta di Kòrsou. E negoshinan marítimo i logístiko ta na Panamá pa hasi kontakto, fortifiká lasonan i pa tuma nota di e último desaroyonan den sektor marítimo.
Riba djaluna Promé Minister a duna un ‘keynote speech’ durante di e Konferensia Marítimo na Panamá den presensia di e CEO di Kanal di Panamá, ing. Jorge Luis Quijano, i Sekretario General di Organisashon Internashonal Marítimo, Sr. Kitack Lim. Promé-minister a enfoká riba e posibilidatnan riba merkado pa sektor logístiko i marítimo na Kòrsou. El a hasi yamada na esnan presente pa koperashon mas fuerte i a presentá Reino komo un partner di negoshi logístiko pa Panamá, ku Kòrsou en partikular komo un fasilitadó perfekto mirando su geografia, e potensia di ta un hùp i e konekshonnan den sektor marítimo. El a elaborá tambe riba e desaroyonan marítimo interesante na Kòrsou.
Negoshinan di Kòrsou ku a tuma parti den e mishon tabata: Damen Shipyards, Kompania di Tou Kòrsou (KTK), Curaçao Port Authority, Nautical Marine Trading Services, Curaçao Shipping and Handling Services, Curdin Trading, Curaçao Financial Group, Curaçao International Financial Center’ i Kámara di Komersio i Industria. Durante e mishon Kámara di Komersio i Industria di Kòrsou a firma un “Memorandum of Understanding” ku Kámara di Komersio i Industria di Panamá.
Ademas, Promé Minister a habri e stènt di Reino na e feria di negoshi i mas lat den anochi el a anunsiá lansamentu di ‘Holland House Panama,’ un plataforma pa negoshi di Reino ku ta operá i invertí na Panamá.
Promé Minister tabata di bishita tambe serka Presidente Varela. Nan a hiba un kombersashon ameno i amplio tokante di e desaroyonan den region, entre otro relashoná ku e situashon na Venezuela. Ademas, nan a kombersá tokante di e posibilidatnan pa fortifiká e lasonan ekonómiko ku awor ta haña un impulso pa medio di e Holland House. A proponé pa habri un ‘Oficina de Comercio i Turismo de Panama’ na Kòrsou pa duna mas kontenido na turismo entre a paisnan. Ademas, promé minister a hiba kombersashon ku Viseminister di Komersio, Sr. Alberto Aleman, asosiashon di eksportadó i ku e CEO di Copa Airlines, Sr. Heilbron.
Promé Minister Rhuggenaath a bishitá e hùp humanitario den e zona ekonómiko di Panamá Pasífiko. Esaki ta un sentro logístiko i depósito nobo pa fasilitá ayudo humanitario den kaso di kalamidat i krísis humanitario den region Karibe i Latinoamérika. E Komishon Internashonal regional pa Krus Kòra i e ‘UN Humanitarian Response Depot’ ta establesé einan. E hùp lo kontribuí na harmonisashon di e esfuersonan humanitario regional i tambe mas kapasidat pa e organisashonnan di kordinashon di desaster den region.
