Kòrsou i Ghana kier lasonan ekonómiko
Willemstad – Ku un trahe tradishonal di Ghana bistí, embahador señora Sophia Horner Sam a bishitá promé minister Eugene Rhuggenaath.
Durante e enkuentro a para ketu ku Ghana i Kòrsou tin un historia kompartí, ” A base di nos historia kompartí nos por duna un perspektiva nobo na nos herensia Afro Karibense ku ta hopi mas riku ku lokual nos sa di dje”, sigun promé minister Rhuggenaath. Kòrsou tin ku wak den direkshon di paisnan manera Ghana tambe pa desaroyá ekonómikamente. Señora Horner Sam a splika ku gobièrnu Ghanes ta yuda yen komersiante chikitu. Nan, hopi bes ta produsí produktonan den koperashon ku invershonista di otro paisnan. Ghana ta produsí entre otro chukulati. Un marka speshal ta keda produsí den koperashon ku invershonistanan Hulandes. E embahador a regalá promé minister un ehemplar speshal di esaki. E tela di e paña ku e embahador tabata tin bistí a keda imprentá na Hulanda pero ta bendé na Ghana na unda ta traha trahenan tradishonal kuné. Esaki ta mustra kon e pueblo di Ghana a lanta para riba pia i bira independiente ku asta nan ta traha produktonan pa diferente merkado.
Promé minister Rhuggenaath i embahador señora Sophia Horner Sam ta mira posibilidatnan pa Kòrsou i Ghana tin lasonan komersial den futuro. Un ehèmpel di esaki por ta ku Kòrsou su Freezone por sirbi komo sentro na unda ta bende pañanan produsí na Ghana pa merkado internashonal.
