Publiká riba 24 Mei 2024
WILLEMSTAD/DEN HAAG – Hulanda i Kòrsou lo traha huntu pa prepará kon por usa e gran potenasial di energia di bientu i produkshon di hidrógeno bèrdè na Kòrsou komo transishon pa un ekonomia basá riba energia renobabel riba e isla. Esaki no solamente lo brinda energia bèrdè ekonómiko na individuo i organisashonnan pa uso lokal, pero tambe pa eksportashon. Esaki ya ku e estudionan ehersé pa TNO i Fugro a demostrá ku Kòrsou su potensial ta asina grandi ku fásilmente por desaroyá exportashon di hidrógeno bèrdè na gran eskala.
Riba djabièrnè 24 di mei, Minister Cijntje di Desaroyo Ekonómiko na nòmber di Gabinete Pisas i Minister Jetten di Asuntunan Ekonómiko i Klima, i tambe Sekretario di Estado Van Huffelen di Relashonnan den Reino a firma virtualmente un akuerdo riba puntonan prinsipal di e kolaborashon. Ku e akuerdo akí ta yega na akshonnan konkreto riba e MOU ku a firma un aña pasá.
Den e akuerdo tin deskribí kon lo traha huntu na nivel di gobernashon i (tòp)funshonarionan pa yega nas mas estudio i tambe e finansiamentu nesesario di mas o ménos 10 mion euro. Tambe a akordá ku lo traha den forma di triángulo entre gobièrnu, negoshinan i institutonan di konosementu na Hulanda i Kòrsou. Meta di esaki ta pa hasi uso optimal di e konosementu internashonal i pa yega na ideanan den konteksto lokal di Kòrsou. Di parti di Gobièrnu di Kòrsou ta partisipando e ministerionan di Asuntunan General, Desaroyo Ekonómiko, Tráfiko Transporte i Planifikashon Urbano i Salú, Naturalesa i Medio Ambiente.
Konkretamente, lo investigá e instalashon i diseño di un fase ‘demo’ ku molinanan di bientu flotante ku ta produsí elektrisidat pa kreá hidrógeno bèrdè i otro kombustibelnan renobabel pa medio di elektrólisis, un asina yamá kadena di balor hidrógeno (waterstof waardeketen). Lo ehekutá e fase ‘demo’ riba un eskala limitá, kual tin komo meta tambe pa wak kon por keda eskalá e produkshon den e kadena di balor, i kiko tur ta nesesario pa internashonalmente hasi e produkshon di hidrógeno na Kòrsou operashonalmente, teknológikamente i komersialmente mas kompetitivo. Lo kana e trayekto akí den konsulta kontinuo ku stakeholdernan i tambe komunidat pa determiná e mihó benefisionan i posibel desbentahanan pa Kòrsou, i kon nos ke bai benefisiá en grande di e potensial pa krea energia bèrdè, tantu pa uso lokal riba e isla komo pa eksportashon.
Pa loke ta e parti di komièrso na Kòrsou, e kompanianan di gobièrnu partisipante ta Aqualectra, Refineria di Kòrsou, Curoil i CPA (outoridat di haf). For di Hulanda ta kolaborando ku 3 organisashonnan grandi di sektor (IRO pa industria offshore, NedZero pa energia di bientu, i NLHydrogen pa e parti di kímika) ku huntu ta representá mas ku 700 kompania. Durante firmamentu virtual di e akuerdo tabatin representashon di e organisashonnan di sektor na Hulanda presente.
Tin gran interes di parti di e industrianan Hulandes pa motibu di e gran potensial ku Kòrsou tin pa produsí hidrógeno, kual ta un nesesidat grandi na Hulanda i Oropa den kuadro di e esfuersonan pa hasi industrianan (pisá) i e sektor di transporte mas bèrdè. E kadena di balor hidrógeno ku aktualmente ta eksplorando na Kòrsou, ta traha ku teknologia ku ta mundialmente hopi nesesario pero riba algun aspekto te ainda ta na komienso di su desaroyo i pues ta pidi sierto innovashon. E industria Hulandes por usa e eksperensia i innovashonnan ku ta logra na Kòrsou despues mundialmente den proyektonan similar. Esaki ta krea un situashon di “win-win” balioso pa Reino.
Den kuadro di e kolaborashon, no solamente lo evaluá kon e kadena di balor hidrógeno por keda implementá konkretamente, pero tambe kua benefisionan stratégiko Kòrsou ke saka for di esaki, kua ta e kondishonnan hurídiko nesesario, kon mester implementá e struktura di gobernashon (maneho i supervishon) i tambe lo kuminsá komuniká i interkambiá ku stakeholdernan i komunidat riba e diferente posibilidatnan pa aplikashon lokal di energia renobabel. Meta ta pa promé ku fin di 2024 ya kaba finalisá algun estudio.
