Publiká riba 25 Ougùstùs 2025
Komo parti di e Strategia di Ekspòrt pa Industrianan Kreativo di Kòrsou, e Komishon Industria Kreativo di Kòrsou ta bai start un seri di enkuentro pa personanan aktivo den e industria kreativo di Kòrsou.
Industria Kreativo ta un industria ku ta konsistí di diferente empresa chikí, hopi freelance i profeshonalnan independiente. Pero alabes, e tin e potensial pa generá balor ekonómiko, promové inovashon i bienestar. E ta konsisti di diferente sub-sektor manera, arte, arkitektura, pelíkula, músika, diseño digital, medionan moderno i asta software.
Djárason awor 27 di ougùstùs 2025 di 19.00 pa 21.00 or na Kini2 Office Building (Kinikiniweg 2) frente Verkeerspark, e promé seshon pa profeshonalnan spesífikamente aktivo den merkadeo i teknologia, lo tuma lugá.
Meta di e enkuentronan aki ta pa artistanan, empresarionan, ‘freelancers’ i otro profeshonalnan den industria kreativo i kultural, será konosí ku e komishon ku a keda establesé aña pasá (2024) pa medio di un dekreto firmá pa tantu Minister di Desaroyo Ekonómiko, komo Minister di Enseñansa Siensia Kultura i Deporte.
E komishon ta konsistí di un kolektivo di representantenan di industria kreativo di Kòrsou aktivo den e áreanan manera merkadeo, kreashon i produkshon di músika, farándula i arte visual i artesania.
Tambe tin representashon di instansianan relashoná ku ekonomia, edukashon i kultura, komersio, turismo, kolekshon di datos, promoshon di invershon i èkspòrt, produkshon di pelíkula i inovashon den e komishon. E komishon lo splika kiko nan plannan ta pa yuda desaroyá e sektor kreativo di Kòrsou.
Tambe e evento mester stimulá interkambio entre esnan den e sektor kreativo i asina promové mas moveshon i kolaborashon ku ta benefisiá nos ekonomia.
Dor di tene charlanan tokante un tema di interes pa e sektor kreativo durante e enkuentronan di ‘Kòrsou Kreativo’, ke hasi e sektor mas konsiente di desaroyonan i alabes inspirá esnan aktivo den industria kreativo pa tuma akshon.
Banda di e próksimo tema ‘Eksportá bo talento den un mundu digital’ spesialmente pa profeshonalnan den merkadeo i teknologia, lo tin otro seshonnan di ‘networking’ pa otro gruponan di sektor kreativo. Pues keda pendiente i tene medionan di komunikashon na kuenta.
Partisipashon na Kòrsou Kreativo: Eksportá bo talento den un mundu digital’ dia 27 di ougùstùs ta kompletamente grátis, pero mester registrá na https://ai.610.cw/CCIC
Komishon Industria Kreativo di Kòrsou ta hasi un yamada na tur profeshonal spesífikamente aktivo den merkadeo i teknologia pa registrá i akudí na e seshon aki.
