Publiká riba 08 Febrüari 2026
WILLEMSTAD – Djárason 4 di febrüari 2026, Minister Plenipotensiario di Kòrsou na Washington, sr. Jérôme Beeldsnijder, tabata presente na un enkuentro diplomátiko riba invitashon di e Embahador di Alemania na Merka, sr. Jens Hanefeld.
E enkuentro a wòrdu organisá den kuadro di e Kopa Mundial 2026, ku e meta pa trese huntu representantenan diplomátiko di paisnan partisipante i pa enfatisá e importansia di solidaridat internashonal pa medio di deporte.
Durante e anochi, a desvelá e bala ofisial di partido pa Mundial, diseñá pa Adidas i yamá “Trionda”. E nòmber ta referí na tres elemento fundamental: union, pashon i diversidat. E diseño ta inspirá pa e moveshon di olanan ku ta flui, simbolisando e konekshon entre kontinente- i kulturanan. E bala ta representá inovashon, herensia i un futuro kompartí.
Pa Kòrsou, e diseño ta alineá perfektamente ku e narativo di “Ola Blou”, kaminda deporte, identidat di isla, ekonomia blou i kolaborashon internashonal ta uni den un mesahe integral.
E enkuentro tabata un ehèmpel inspirativo di diplomasia deportivo. Kòrsou su presensia a enfatisá e importansia di visibilidat riba tarima mundial, no solamente den deporte pero tambe den seno di e komunidat diplomátiko.
