Publiká riba 20 Sèptèmber 2024
Willemstad – Di djaluna 23 te ku djárason 25 di sèptèmber 2024, Kòrsou lo ta sede di e ‘17th International Law Enforcement Intellectual Property Crime Conference.’ Pa region di Karibe, e evento internashonal prestigioso aki ta un primisia. E konferensia lo atraé mas ku 375 partisipante di rònt mundu. INTERPOL ta organisá e konferensia den kolaborashon ku Gobièrno di Kòrsou i partnernan lokal manera CURINDE i Bureau Intellectuele Eigendom (BIE).
Krimen di propiedat intelektual ta un problema ku dia pa dia ta bira mas grandi. E por tin impakto ekonómiko i sosial pa rònt mundu. Negoshi di produktonan falsifiká por tin konsekuensia serio hasta pa salú di hende i pa integridat polítiko di un pais.
Spònsernan internashonal tambe ta partisipá na e evento aki. E hecho ku tin hopi interes, tantu lokal komo internashonal di instansianan gubernamental i negoshinan den sektor privá ta proba kon importante e konferensia aki ta pa Kòrsou .
E tema di e aña aki ta ‘Reducing the Harm,’ ku enfoke riba e desafionan i desaroyonan relashoná ku e lucha kontra krimen di propiedat intelektual. Zonanan di komersio liber (vrijhandelzones) i seguridat den e kadena di suministrashon lo haña èkstra atenshon. Durante e konferensia diferente organisashon prominente di rònt mundu lo ta presente. Ta trata aki di organisashon i personanan enkargá ku mantenshon di lei, traha maneho i ekspertonan riba tereno di lei.
Pa Kòrsou ta un honor pa ta sede di e konferensia aki. E rekonosementu internashonal ak ta danki na e ròl stratégiko ku nos isla tin komo hùb den e kadena global di suministrashon i e ròl dinámiko ku nos zona di komèrsio liber tin den esaki. Tambe, e konfiansa ku diferente òrganisashon na Kòrsou a kreá na nivel internashonal a kontribuí na e rekonosimentu aki. Esfuersonan di e representante di Kòrsou na sekretariado di INTERPOL tambe a hunga un ròl pa lográ ku e konferensia aki ta tuma lugá na Kòrsou.
Gobièrnu di Kòrsou ta yama e diferente delegashonnan bon biní durante e apertura ofisial djamars 24 di sèptèmber awor.
