Publiká riba 14 Yüni 2023
Rapòrt di IMF ta indiká:
Willemstad- E deklarashon final (‘Concluding Statement’) den e rapòrt ku Fondo Monetario Internashonal (IMF) a publiká fin di mei último, ta indiká ku den 2022 Kòrsou lo konosé un kresementu alrededor di 6,5% di nos Produkto Interno Bruto (GDP). Esaki sin mas ta un desaroyo ku Minister di Desaroyo Ekonómiko, señor Ruisandro Cijntje ta sumamente orguyoso di dje. Prinsipalmente mirando ku esaki ta mustra ku e maneho ku el a bin ta implementá huntu ku su ministerio pa rekuperashon ekonómiko, ta dunando resultado riba término relativamente kòrtiku. For di e pronóstiko di IMF riba aña 2022, por konkluí sin duda ku Kòrsou su ekonomia ta den proseso di rekuperashon. Den aña 2023 tambe IMF ta ferwagt ku tantu nos ekonomia komo inflashon lo sigui krese aunke ménos fuerte ku den aña 2022.
E kresementu di aproksimadamente 6.5% di Kòrsou su Produkto Interno Bruto ta relatá pa gran parti na un kresementu supstansial den e sektor turístiko i invershonnan privá. Den 2022 Kòrsou a registrá un kantidat di alrededor 490 mil turista di estadia ku a keda na Kòrsou un ekivalente di 4.6 mion anochi. Si nos kompará e sifranan aki ku aña 2021, ta trata di un kresementu di respektivamente 85% i 64% den 2022. MEO ta den fase di implementashon di un Strategia Nashonal di Eksportashon pa Kòrsou (NES) ku ta enfoká riba seis (6) diferente área for di kua Kòrsou por eksportá tantu produkto komo servisio. Echo ta, ku turismo ta un di nos produktonan di eksportashon di mas grandi te ku awor.
E maneho aktual di Minister Cijntje huntu ku MEO, ta dirigí riba un Plan Nashonal di Rekuperashon Ekonómiko. E plan akí ta amplia riba e diferente áreanan di maneho ku tin ku resultá den progreso, prosperidat i rekuperashon pa e komunidat di Kòrsou. E Plan Nashonal di Rekuperashon akí, ta inkluí un plan di invershon tantu riba término kòrtiku, medio komo término largu.
Huntu ku e Plan di Rekuperashon akí, ta trahando riba medidanan struktural ku lo bai keda ehekutá bou di e trayekto di ‘Landspakket’ pa por krea e kondishonnan nesesario pa yega na desaroyo berdadero i duradero.
Un desaroyo ku a bini ta manifestá su mes ta e desaroyonan rondó di preis di tantu kombustibel komo komestibel den aña 2022. E desaroyonan akí a bin ta pusha Kòrsou su tasa di inflashon na un nivel rèkert den e aña tras di lomba, kousando tambe un efekto negativo riba e forsa di kompra di e konsumidó. E inflashon den 2022 tabata esun di mas haltu ku Kòrsou a konosé despues di mas o ménos 42 aña.
Loke hopi bia nos no ta para ketu na dje ta, ku mas di 60% di Kòrsou su inflashon ta importá i dor di esaki Gobièrnu di Kòrsou no tin muchu influensia riba e inflashon akí. Loke si Gobièrnu ta trata na hasi ta, pa hasi lo máksimo pa purba mitigá e efektonan di esaki pa e konsumidó. Por ehèmpel den aña 2022 a logra mitigá e inflashon levemente dor di e.o. mitigá e efekto di preisnan relativamente haltu di kombustibel i introdukshon di kòntròlnan adishonal i komparashon di preis di inspekshon ekonómiko riba komestibel.
Mientrastantu, e maneho pa sektor turístiko ta dirigí na sigui diversifiká e sektor aun mas dor di entre otro ‘target’ merkadonan diferente ku un balor agregá haltu i stimulá mas invershon turístiko. Ya kaba por nota ku e kantidat di turista di estadia den e promé lunanan di 2023 a bin ta surpasá e sifranan di e añanan anterior i esaki sin mas ta resultadonan di trabounan duru ku e sektor a bin ta hiba. Durante bishitanan den eksterior, Minister Cijntje a bin ta traha duru tambe pa atraé mas ‘airlift’ pa bula riba e ruta lokal i esaki sigur lo tin efektonan positivo den e sektor turístiko i desaroyo ekonómiko di nos pais.
