Willemstad- . Djabièrnè 10 di mei 2024, Minister di Desaroyo Ekonómiko a lansa e trayekto pa eksportá muzik di Kòrsou rònt mundu. Minister Cijntje a bin ta traha duru riba diversifikashon ekonómiko basá riba e strategianan ku ta deliniá den e ‘National Export Strategy (NES)’. Un di e trayektonan den NES ta e desaroyo di sektor kreativo na Kòrsou, ku ta konta ku tur forma di arte, entre otro músika.
Dilanti un sala yen di talento, minister Cijntje a duna inisio na e trayekto di eksportashon di músika, deklarando ku huntu ku tur músiko lo sòru pa mehorá e kondishonnan pa e músiko empresario. E músiko mester enfoká riba su kreatividat i arte pa produsí muzik di kalidat pa eksportashon. E minister a enfatisá, ku aki ta trata di tur género di muzik ku atraves di mas ku 400 aña a bin ta forma parti di nos esena musikal: For di jazz te ritmo kombiná i di muzik di zumbi pa kantika pa mucha te rèp i son montuno.
Eksportashon di muzik por ta kompliká, ya ku e avanse teknológiko a hasi di músika algu ku mayoria di nos ta eksperensiá. Pero, mas prinsipal ta ora nos produsí muzik di kalidat pa mundu por disfrutá di dje òf presentá muzik bibu riba esenario den eksterior.
Eksportashon di muzik ta trese vários benefisio ekonómiko. Na promé lugá e músiko ta generá mas entrada via regalia presentashon tantu lokal komo den eksterior. Na di dos lugá, e ta generá kupo di trabou, ya ku e artista i músiko ku toka instrumènt ta un profeshonal. Tambe, eksportashon di músika ta krea divisa pa nos pais ku tin efekto positivo pa ku nos ekonomia. Huntu ku tur esakinan, eksportashon di muzik ta duna realse na imágen di Kòrsou den eksterior. Nos tin músikonan ku a haña rekonosementu importante den eksterior, manera Grammy awards.
Komo parti di e trayekto, lo kombertí sentro di siudat (Punda, Otrobanda, Pietermaai, Skalo) den un siudat di músika. Esaki lo kontribuí aun mas na atraé turista ku ta bishita sentro di siudat djis pa disfrutá di e ambiente alegre, pero tambe nos hendenan lokal ku gusta muzik. Esaki ta trese un ambiente tantu di dia komo anochi den nos sentro di siudat.
Dia 10 di mei, minister Cijntje ofisialmente a habri e ofisina pa sostené i eksportá muzik den e edifisio di Ministerio di Desaroyo Ekonómiko. Músikonan por drenta den kontakto ku e ofisina pa mas informashon na alvin@curacaomusicoffice.com òf skèn e kódigo abou pa bira parti di e komunidat di whatsapp i haña tur informashon di servisionan ku e ofisina ta ofresé.
Bira parti di e komunidat di Curaçao Music Office
