Publiká riba 15 Òktober 2025
WILLEMSTAD — Gobièrnu di Kòrsou, pa medio di Ministerio di Desaroyo Ekonómiko, ta orguyoso di anunsiá e proklamashon ofisial di 15 di òktober komo Dia Nashonal di Industria Lokal.
Durante un seremonia solèm, Promé Minister Gilmar Pisas i Minister di Desaroyo Ekonómiko Roderick Middelhof a firma e dekreto ku ta proklamá e dia aki komo Dia Nashonal di Industria Lokal. Ku e akto aki, gobièrnu ta rekonosé e kontribushon krusial di produktornan lokal na kresementu ekonómiko i desaroyo duradero di Kòrsou.
“Nos produktornan lokal ta e wesu di lomba di nos resiliensia ekonómiko,” Minister Middelhof a bisa. “E dia spesial aki ta un rekonosementu pa nan trabou duru, kreatividat i dedikashon pa futuro di Kòrsou.”
Dia Nashonal di Industria Lokal ta pone énfasis riba e ròl esensial ku produktornan lokal ta hunga den fortalesé ekonomia di Kòrsou, stimulá inovashon i krea empleo.
Ku e dia aki tambe e Ministerio ke oumentá konsientisashon tokante e importansia di sostené kompanianan lokal i pone atenshon na kalidat i diversidat di produktonan di Kòrsou.
Den kolaborashon ku Curaçao Manufacturers Association (CMA), lo organisá e CMA Expo mas lat e siman aki na Sambil Curaçao (18 di òktober 2025), kaminda kompanianan lokal lo presentá nan produktonan i inovashonnan na públiko.
