Publiká riba 28 Sèptèmber 2025
NEW YORK — E bishita ofisial di Promé Minister, sr. Gilmar Pisas, i su delegashon den kuadro di e di 80 Seshon di Asamblea General di Nashonnan Uní (UNGA80), a yega na su final despues di un siman di interkambio diplomátiko intensivo, reunionnan stratégiko i partisipashon na eventonan di halto nivel.
Promé Minister Pisas ta akompañá pa e siguiente miembronan di delegashon:
Sra. Melissa Vásquez, Hèfe di Gabinete i konsehero di Minister Presidènt, sr. Djuric Comenentia, Sekretario General di Ministerio di Asuntunan General, i sra. Vanessa van Dijsseldonk, Kolaboradó di Gabinete di Minister Presidènt.
Durante e bishita a sostené diferente tipo di diálogonan ku lidernan global i aktornan importante di sektor públiko internashonal. E temanan prinsipal diskutí tabata entre otro: sostenibilidat, temanan klimátiko, desaroyo ekonómiko integrá, seguridat internashonal i en partikular e situashon geopolítiko entre Venezuela i Merka.
Promé Minister Pisas a dirigí diálogo i a tene reunionnan bilateral ku homólogonan di diferente pais i a tuma parti na diferente foro relevante kaminda el a kompartí su mira riba e desafionan global pa “Small Island Development States” i e oportunidatnan pa nos region.
E bishita na UNGA80 a habri porta pa mas kooperashon i a pone nos pais Kòrsou, komo parti di Reino Hulandes, riba mapa internashonal. E bishita a sirbi tambe komo un plataforma pa fortalesé nos lasonan internashonal i pa hasi un apelashon pa akshon kolektívo riba temanan urgente ku ta afektá tantu nos region komo nos planeta den su totalidat.
Promé Minister Pisas ta wak bèk riba un bishita ofisial konstruktivo i fruktífero.
