Publiká riba 11 Aprel 2025
Ministerio di Desaroyo Ekonómiko ta duna inisio na revishon di maneho di FDI ku enfoke riba ekonomia blou i transishon energétiko.
Willemstad – Ministerio di Desaroyo Ekonómiko (MEO) a organisá e tayer di maneho “Promoviendo Invershon pa Desaroyo Sostenibel” riba djaluna 7 di aprel. E tayer aki ta marka e inisio ofisial di un trayekto di konsultashon amplio dirigí riba e revishon di e maneho di invershon direkto di eksterior (Foreign Direct Investment – FDI) di Kòrsou.
E tayer ku a tuma lugá na Renaissance Wind Creek Curaçao Resort, a trese representantenan di instansianan gubernamental, asosiashonnan empresarial i zona ekonómiko huntu. “Huntu nos ta traha pa yena na un klima di invershon fortifiká ku ta aliniá ku e metanan di desaroyo sostenibel (SDG’s) di Kòrsou”.
Den su diskurso di apertura, Vanessa Toré, Direktor di Sektor di Koperashon Ekónomiko ku Eksterior, a enfatisá e importansia di invershonnan eksterior pa e transformashon ekonómiko di Kòrsou:
“E tayer aki no ta un reunion di solamente un bia, pero e ta komienso di un trayekto nashonal. Huntu nos ta konstruí un maneho di invershon duradero ku ta posishoná Kòrsou komo un destinashon di invershon duradero i atraktivo.”
Oradó prinsipal durante di e evento tabata Paul Wessendorp, anterior hefe di Promoshon di Invershon na UNCTAD i konsehero internashonal riba tereno di FDI. Den su presentashon el a trata e tendensianan mundial pa promoshon di invershon aliniá ku e Metanan di Desaroyo Sostenibel (Sustainable Development Goals – SDG’s) i e importansia di strategianan dirigí pa islana chikitu manera Kòrsou.
Durante su bishita na Kòrsou, Wessendorp a tene kombersashonnan bilateral ku diferente stakeholder, inkluyendo Kámara di Komèrsio (KvK), CINEX, CURINDE, Curaçao Tourist Board (CTB), Ministerio di Desaroyo Ekonómiko (MEO) i representantenan di organisashonnan di sektor privá. Tambe el a interkambiá ideanan ku Minister di Desaroyo Ekonómiko Charles Cooper tokante e importansia di FDI pa desaroyo sostenibel i e gobernashon i efektividat di Agensianan di Promoshon di Invershon (Investment Promotion Agencies – IPA’s).
Ademas, durante di e tayer a presentá e Strategia Nashonal di Eksportashon (NES) di Kòrsou, ku atenshon spesial pa oportunidatnan di invershon den transishon energétiko i ekonomia blou—dos sektor ku gran potenshal pa kresementu sostenibel i koperashon internashonal.
E tayer ta marka e komienso di un proseso mas amplio, kaminda di awor te òktober 2025 lo tuma lugá diskushonnan profundo ku stakeholdernan relevante. E meta final ta pa desaroyá un roadmap nobo pa maneho di invershon pa Kòrsou.
Pa mas informashon tokante NES bishitá https://meo.cw/service/national-export-strategy
Kontakto pa prensa:
Vanessa Toré
Direktor di Sektor di Koperashon Ekonómiko ku Eksterior
E-mail: vanessa.tore@gobiernu.cw | Tel +599 95128443
