Notisia

WILLEMSTAD – Kòrsou den fin di siman di 1 pa 3 novèmber 2019 a partisipá na e di 24 edishon di  ‘Juegos Deportivos Universitario Tony Barreiro’, ku a tuma lugá na República Dominicana. Ta trata akí di un torneo di futbol di sala ku partispashon di 4 universidat di República Dominicana. E torneo aki a keda organisá pa Universidad Autónoma De Santo Domingo.

Kòrsou a keda dignamente representá pa nos hóbennan i a keda titulá kampeon di e torneo aki. E tim di Kòrsou a keda selekshoná i guiá pa Student Sport Federation Dutch Caribbean (SSFDC) ku a sa di hasi un bon trabou. Nos selekshon representá pa Kevin Lodowika,  Gerson Rifaela, Gedion Sille (MTS), Ryandrik Camelia (ICUC), Brian La Croes, Briangelo La Croes, Ericson Girigory i Hugo Gabriel (FEFFIK), Lixiangelo Martis (Marnix VSBO), Gabriel Sterling, Jean Paul Benitez i Johendry Loyd (Nilda Pinto SBO) i  bou di guia di Sr. Mauritz “Mau” Maria, a konkistá e promé lugá ku hopi ánimo.

Ministerio di Enseñansa, Siensia, Kultura i Deporte (ESKD) konforme e akuerdo i programa di gobernashon ta sigui motivá i stimulá desaroyo di nos mes hendenan en general i en partikular nos hóbennan

Gradisimentu profundo ta bai pa e kontribushon di kada un di e aktornan manera SSFDC, MTS, ICUC, Feffik, Marnix VSBO i Nilda Pinto SBO ku huntu ta yuda engrandesé deporte bou di nos hóbennan i hasi e partisipashon di nos hóbennan na e torneo aki posibel. Boso aporte a pone ku awe un biaha mas nos ta titulá kompeon.

Minister di Enseñansa, Siensia, Kultura i Deporte sra. M. Alcalá-Wallé  komo e titular enkargá ku Deporte, na nòmber di Gobièrnu di Kòrsou ta felisitá tur e studiantenan pa e logro akí.

—

KOMUNIKASHON

MAS NOTISIA

Ministerio konserní: Enseñansa, Siensia, Kultura & Deporte