Notisia

Willemstad- Kòrsou ta uni ku mundu awe pa selebra dia internashonal di Hòmber, awe ku e tema “selebra nos hende hòmber i nos mucha hòmber” un momentu pa reflekshoná, honra e hòmber pa nan dedikashon, kurashi i balentía pa ta pilarnan fuerte di nos komunidat. E selebrashon di e aña aki, ta un ku un energia mas festivo aun, nos ta para na un era nobo pa pais Kòrsou. E soño di hopi hende hòmber i mucha hòmber pa generashon nan a ser regalá awe, despues di luchanan, perseveransia i dedikashon di nos ekipo nashoanl destakando aya na Jamaica klasifikando pa Mundial 2026. Na nòmber di Minister di Desaroyo Sosial, Labor i Bienestar i su ministerio den su totalidat ta felisitá pueblo di Kòrsou spesialmente nos hende hòmbernan i mucha hòmbernan riba e dia aki.

Komo e ministerio enkarga ku bienestar, ta nos responsablidat di ekipá nos komunidat ku e amor i atenshon ku nan mester. Selebrando hende hòmber i nos mucha hòmbernan no ta solamente felisitá i kordanan riba e dia aki pero tambe enkargános mes pa duna realse i e edukashon nesesario pa nos por garantisa ku nos ta elevanan den tur aspekto.

Komo un ministerio responsabel, enkarga ku bienestar Minister Charetti America-Francisca no solamente ta desea selekshon nashonal un pabien, pero e ta enfatisa ku nan eksito no ta solamente un viktoria pa yega mundial, e ta un simbolo di kon nos ke ekipa nos hende hòmbernan ku perseveransia, unidat i potenshal pa logra tur loke nos propone. E sintimentu di selebrashon i orguyo i speransa ku nos mucha hòmbernan a lanta kune awe, nos ke perkurá pa ta bibu den nos komunidat, dunando atenshon i oido na e retonan ku nos hòmber i mucha hòmbernan ta enkontra diariamente. Ban sigui biba pushando i ekselando nos famia i nashon pa ta unu ku ta inkluí e atenshon, réspét i amor pa nos hòmbernan i mucha hòmbernan.

Dia internashonal di hòmber ta rekordá nos e responsablidat pa elevá i empoderá nos hende hòmber i mucha hòmbernan di Kòrsou. Nos ta rekonosé e ròl esensial i importante ku nan ta ehersé na momentu di krea famianan fuerte, komunidat sano i sosiedatnan próspero. Pa e motibu aki nos ministerio ta trahando riba manehonan duradero kaminda nos ta reforsando nos programanan ku mas inklushon i atenshon pa nos hòmbernan i mucha hòmber. Sigur e atenshon ta pa nos pone podionan aksesibel pa hòmbernan i mucha hòmber nan wordu selebrá, ta visibel, ta empoderá i wordu apoyá.

Felis Dia Internashonal di Hòmber! Hunto, nos ta kontinuá na konstrui un futuro kaminda nos hòmber i mucha hòmber ta soña grandi, i sigui krea historianan duradero i bunita pa nos país.