Publiká riba 03 Yüni 2024
WILLEMSTAD – Riba invitashon di e “Crisis Management Organization” (CMO) di Aruba e kordinadó nashonal di krísis (sr. Lesley Fer) konhuntamente ku e sekretario (sra. Graciëla Statia) di e organisashon di krísis i kalamidat di Kòrsou (CRBo), a biaha pa Aruba resientemente.
Sr. Fer i Sra. Statia ta forma parti di e ‘crisisstaf’ di Kòrsou. E ‘crisisstaf’ ta konsistí entre otro di e: komandante di brantwer, hefe di kuerpo polisial, kordinadó di krísis nashonal, kordinadó di krísis médiko i di e sekretario di e ‘Crisisbeheersing –en Rampenbestrijdingsorganisatie’ (CRBo). E ‘crisisstaf’ ta konsehá e Minister di Asuntunan General – ku den momento di krísis òf kalamidat ta bira ‘opperbevelhebber’ – kon pa mitigá efektonan di un krísis òf kalamidat.
Meta di e bishita di trabou akí tabata pa sera konosí ku e organisashon di desaster di Aruba (CMO) i interkambiá di konosementu, pero primordial pa sigui traha riba e palabrashonnan ku tin entre Kòrsou i Aruba pa brinda asistensia na otro promé, durante i despues di un situashon di krísis òf kalamidat ku por asotá e paisnan. Despues di e orkan Irma (2017) ku a asotá St. Maarten i laga basta destrukshon atras, e direktorado di kontrol di riesgo i maneho pa kalamidat di Kòrsou a tuma e inisiativa i a organisá un ‘high level meeting’ na aña 2018 na Kòrsou, pa evaluá e ‘samenwerking’ entre e paisnan di Reino durante un kalamidat. Na e ‘high level meeting’ akí tabata presente e.o Gobernador di Sint Maarten i Kòrsou, Minister Presidènt di Aruba, Kòrsou i St. Maarten i representantenan di Boneiru, Saba i Statia, kaminda a palabrá ku paisnan di Reino mester bai traha mas den estrecho koperashon ku otro pa ku situashonnan di krísis òf kalamidat.
Durante e último edishon di e “Week v/d Crisisbeheersing” na Boneiru den luna di desèmber aña pasá, e kordinadónan nashonal di krísis di e diferente paisnan den Reino a bolbe indiká e nesesidat di traha huntu i e importansia pa formalisá esaki den un kombenio. Enfoke di un kombenio di koperashon ta pa paisnan den Reino por brinda yudansa i fortifiká otro promé, durante òf despues di un situashon di krísis òf kalamidat den Reino. Kòrsou huntu ku Aruba i Boneiru a dal e promé stap pa yega na formalisá e yudansa ku por ser brindá den un situashon di krísis òf kalamidat. Meta ta pa e palabrashonnan pa ku koperashon i yudansa lo ser ankrá den un kombenio yamá “Memorandum òf Understanding” (MOU) ku lo mester ser firmá pa mandatarionan di Aruba, Boneiru i Kòrsou.
Pa mas informashon tokante desaroyonan riba e área di krísis i kalamidat por bishitá www.kalamidat.cw òf bishitá e página di Facebook: RisicobeheersingCuracao.
