Publiká riba 20 Novèmber 2025
WILLEMSTAD – For di 24 pa 28 di novèmber 2025, Kòrsou lo ta anfitrion di Siman di Maneho di Krísis i Komunikashon di Krísis. Pa e di seis biaha kaba, e konferensha bianual akí ta trese kolaboradónan di maneho, servisionan di emergensia i partnernan den henter Reino Hulandes huntu, pa fortifiká e kolaborashon den Reino riba tereno di maneho di krísis.
Pa di dos aña konsekutivo tambe lo pone atenshon na komunikashon di krísis: kon ta kompartí i kordiná informashon den tempu di krísis, i kon nos ta garantisá komunikashon kla, na tempu i konfiabel ku públiko? Na novèmber 2024 e Siman di Maneho di Krisis i e promé edishon di Siman di Komunikashon di Krísis a tuma lugá na Aruba.
Huntu ku e tema “Un Reino, un forsa – Huntu resiliente den tur krísis” di e aña akí, kolaborashon ta para sentral. Dor di interkambiá konosementu i eksperensia i diskutí tokante situashonnan spesífiko, konhuntamente ta konstruí un Reino mas fuerte, mas ágil i mihó prepará.
Organisashon di e konferensia ta den man di Ministerio di Hustisia i Seguridat (JenV) i Ministerio di Asuntunan Interno i Relashonnan den Reino (BZK) den estrecho koperashon ku Kòrsou komo pais anfitrion, representá pa Direktorado di Kontrol di Riesgo i Maneho pa Kalamidat (DRR) i Direktorado di Komunikashon i Informashon (C&V).
Un di e puntonan kulminante di e konferensha ta e sentro nobo di krísis COC3 na Kòrsou, ku pronto lo habri ofisialmente su portanan. E sentro akí ta diseñá pa manehá krísisnan nashonal for di un solo lugá. E ta sirbi tambe komo un sentro di konosementu kaminda informashon tokante riesgo i kalamidatnan lo ta disponbibel pa entre otro skolnan i partidonan interesá.
E konferensiaa ta tuma lugá na Corendon Mangrove Beach Resort i lo konsistí di seshonnan plenario, gruponan di trabou, simulashon i bishitanan di trabou. E presensia di diferente delegashonnan ta suprayá e importansia ku Reino ta duna na preparashon konhunto, sosten mutuo i bon komunikashon den tempu di krísis. 
