Publiká riba 24 Yüni 2025
WILLEMSTAD – Djabièrnè 27 di yüni 2025, Ministerio di Desaroyo Ekonómiko (MEO), den kolaborashon ku Kámara di Komèrsio di Kòrsou, ADECK i Mi NEGOSHI, ta organisá e selebrashon nashonal di Dia di Empresario, un dia dediká na stimulá e espíritu empresarial kresementu i kolaborashon.
Bou di e tema “Impulsando Kresementu i Desaroyo”, nos ta invitá empresarionan di tur sektor i personanan ku ta aspirá pa bira empresario pa partisipá na e evento ku lo tuma lugá na Hanchi Junior Salas, entre 1’or di mèrdia pa 7’or di anochi. Durante e evento lo tin diferente presentashon, entre otro di Señor Dino Daal, ku lo habri e atardi ku un charla titulá Fo’i Produkto pa Eksperensia Transformativo den sektor di turismo. Señor Quincy Martina di SBAB lo duna informashon riba e importansia di un bon atministrashon pa kualke negoshi. Señor Wilfred Isabella di Duana tambe lo kontribuí ku un presentashon tokante proseduranan di importashon via Duana.
Sra. Vanessa Toré di MEO lo presentá e diferente posibilidatnan i areglonan di RVO ku por yuda empresarionan ku ke eksportá. Despues di esaki, sra. Angeninne Nicolina di Mi NEGOSHI Shared & Support Services lo splika kon nan ta asistí negoshinan bou di e lema: Bo Negoshi, Nos Mishon. Señor Klarvin Cijntje di Kunuku Kitchen lo kompartí su eksperensia riba kon pa redusí gastu den agrikultura usando ‘Syntropic Farming’. E evento lo konkluí ku un diskurso di Sr. Roderick Middelhof, Minister di Desaroyo Ekonómiko.
Ademas di e presentashonnan, lo tin un marshe di informashon, ku representashon di entre otro, CBS, Mi NEGOSHI Shared & Support Services, KvK, Polis/UWB, Qredits, Fundashon Marshe, ADECK i SVB. DJ Denny lo animá e evento henter dia. Kuminda i bebida lo ta na enkargo di Volcano i tambe lo tin kos di boka dushi prepará pa sra. Shalymara. Tur ku ta deseá por pasa na nos ‘food court’ pa kumpra algu na smak.
Durante e Happy Hour Empresarial ku ta di 6or pa 7or di anochi, lo tin músika bibu di High Way Band.
Dia di Empresario ta ofisialmente rekonosé for di aña 2024 i ta konsedí ku Dia Internashonal di Empresanan Mikro, Chikí i Mediano proklamá pa Nashonnan Uní. Ku e selebrashon aki nos ta honra e kontribushon di nos empresarionan na e desaroyo di nos isla, miéntras nos ta brinda sosten i inspirashon.
E selebrashon ta tuma lugá na Hanchi Junior Salas (E kaya enfrente di Kámara di Komèrsio i Mi NEGOSHI), di 1:00 PM – 7:00 PM. Por registrá via e QR-code riba e flyer òf via: bit.ly/DiaDiEmpresario2025
Pa mas informashon, por bishitá e página di Facebook di Ministerio di Desaroyo Ekonómiko.
