Notisia

Willemstad – Kòrsou a selebrá su promé Konferensha Nashonal i Internashonal di Kooperativismo den kuadro di Aña Internashonal di Kooperativismo, deklará pa Nashonnan Uní. E evento a tuma lugá na Dreams Hotel & Casino Curaçao, dianan 23 i 24 di yanüari 2025.

A konferensia a konta ku 60 partisipante lokal i 50 internashonal for di e seis paisnan: Honduras, Repúblika Dominikana, Costa Rica, Panamá, Boneiru i Spaña. Entre e partisipantenan tabatin presidentenan di e organisashonnan internashonal manera COLAC, CCC-CA i CONACOOP.

Sr. Lutson Lucas, presidente di FKUP, a duna un bon biní ofisial na tur e partisipantenan. Minister di Ekonomia, Sr. Charles Cooper, a enfatisá importansia di kooperativismo i su impakto sosial i a pidi pa no pèrdè e berdadero enfoke di kooperativismo, ku ta desaroyo di e hende i e relashonnan ku ta uni e komunidat sosial. Sra. Zulaika Mook, direktor di e Departamentu di Desaroyo Ekonómiko i Inovashon di MEO, a duna un diskurso inspirativo, rekordando ku den e tempu limitá ku nos tin riba Tera, no ta e rikesa, status, poder òf fama ta mas importante, sino kuantu nos a stima i kuantu nos a kontribuí pa mehorá bida di otronan. 

Un di e momentunan mas emoshonante di e kongreso tabata e rekonosementu póstumo na Pader Amado Römer, un figura fundamental den desaroyo di kooperativismo na Kòrsou i Latinoamérika. Pader Römer no solamente a funda FEKOSKAN, un modelo ku hopi pais den nos region a sigui, pero tambe a ko-fundá COLAC (Confederación Latinoamericana de Cooperativas de Ahorro y Crédito). Su firma tabata e promé riba e dokumento di fundashon di COLAC, un orguyo pa tur yu di Kòrsou. Su trabou inkansabel den edukashon i konstrukshon di e movementu kooperativo ta keda rekonosé komo un legado. Señor Raymond Pacheco Römer a representá famia Römer i a tuma e plakat i a dirigí su mes na e sala ku palabranan elokuente, deskribiendo e persona di Pader Römer i su nifikashon pa su famia i pa su pueblo.

Durante e konferensha, ekspertonan i panelistanan di altu nivel a trese temanan fundamental dilanti:

• Ekonomia sosial i desaroyo sostenibel – Presentá pa Dalia Borge, kordinadó pa Latinoamérika di Skol di Ekonomia Sosial di Andalucía, Spaña.
• Inovashon den kooperativismo – Presentá pa Alberto Mora, direktor ehekutivo di COLAC.
• Polítikanan públiko pa fortalesimentu di kooperativismo – Presentá pa Luis Guillermo Coto, direktor ehekutivo di CCC-CA.
• E strategianan pa kresementu di kooperativanan – Presentá pa Earlich Lourens, presidente di FEKOSKAN.
• Ekspertonan manera Cástulo Vidal (COLAC), Xiomara Núñez de Céspedes (ACI América) i Eufracia Gómez Morillo (CCC-CA) tambe a duna presentashonnan balioso.

Chesron Isidora, konsehero finansiero i desaroyo empresarial, a resaltá ku su presentashon kon “Kooperativismo por Krea Bentahanan Kompetitivo pa Empresanan Chikí” i el a duna e hèrmènt pa aplikashon efektivo di esaki.

Konklushonnan Klave di e Kongreso:

1. E poder di kolaborashon: A keda bon kla ku ora uni esfuersonan, ta posibel pa superá e desafionan di mas kompliká. E forsa kolektivo ku ta definí kooperativanan ta su bentaha di mas grandi den un mundu yen di inseguridat.
2. Sostenibilidat komo pilar fundamental: Kooperativanan no ta solamente aktornan ekonómiko, sino tambe e protektornan di bienestar di hende i planeta. E kompromiso ku desaroyo sostenibel ta un responsabilidat ku kooperativanan mester tuma ku determinashon (liderato) i konvikshon.
3. Inovashon komo kaminda pa futuro: Pa enfrentá e reto di un mundu ku ta kambia konstantemente. Pues, pa kooperativismo por keda unu sostenibel, kooperativanan mester sigui eksplorá ideanan i aplikashonnan nobo, adaptá teknologianan emergente i integrá un enfoke kreativo. Inovashon ta esenshial pa mantené kooperativismo su relevansia i impakto.

E parti ofisial di e kongreso a sera ku un diskurso sentral di Jerson Hárrigan, presidente di Fundashon Ekonomia Sosial Kòrsou. E evento a keda marká pa un enfoke sólido riba kolaborashon, sostenibilidat i inovashon, fortalesiendo e futuro di kooperativismo na Kòrsou i internashonalmente. 

MAS NOTISIA

Ministerio konserní: Desaroyo Ekonómiko