Publiká riba 18 Novèmber 2025
WILLEMSTAD – Riba Dia Oropeo kontra Abuso di Mucha, Minister di Hustisia Shalten Hato a marka un momentu hopi importante: un (1) aña eksakto ku nos isla a introdusí e kampaña di konsientisashon “Kiko i e Man”. E kampaña ta enfoká riba protekshon di mucha i ta duna un mensahe fuerte ku abuso infantil NO tin lugá den nos komunidat di Kòrsou.
E kampaña a keda presentá na Minister Hato promé biaha den yüni 2024 durante un bishitá di trabou na Straatsburg na Konseho di Europa. Inmediatamente despues di e presentashon, Minister Hato tabata desidido ku mester implementá e kampaña aki na Kòrsou tambe. Awe, un aña despues di lansamentu, “Kiko i e Man” a bira un instrumento fundamental den e esfuersonan nashonal pa prevenshon, edukashon i konsientisashon di seguridat di mucha.
“Kiko i e Man” ta pone énfasis riba e símbolo di e man: un fuente di kuido, protekshon i apoyo. Mesora tambe e kampaña ta indiká importansia pa detektá kontakto no deseá i pa skohe pa no keda ketu den kaso di abusu. Minister Hato a enfatisá ku kontakto físiko ta parti di nos kultura, pero nos mester siña nos muchanan pa identifiká diferensia entre kontakto apropiá i kontakto no apropiá.
Durante e selebrashon di un aña, Minister a presentá un jingle nobo, kantá pa Jada van Dijk, kompositá pa Roshendly Martina, konosí komo Roshdrums i areglá pa Angelo Borrell Dopwell di Dopwell Music. E jingle tin e meta pa yuda nos muchanan bira mas konsiente di nan propio kuido i prohibí adultonan di mishi ku nan parti priva. Ademas, dos video di konsientisashon, produsí pa Pelíkula Studios, tambe a ser lansá. E material tantu di audio i tambe visual lo ta disponibel pa skolnan, mayornan i profeshonalnan den e áreanan di kuido.
Minister Hato a hasi un yamada na henter komunidat pa sigui sostené e kampaña i pa traha huntu pa protehá nos muchanan. Na e muchanan presente el a manda un mensahe kla: “No laga niun hende mishi ku bo di un manera ku no ta sinti bon. Papia. No keda ketu.”
Ministerio tambe a anunsiá ku “Kiko i e Man” lo sigui bishitá mas skol na próksimo luna(nan)pa por yega ku e mensahe di konsientisashon serka mas mucha.
