Notisia

WILLEMSTAD – Riba 25 di sèptèmber 2025, Minister di Enseñansa, Siensia, Kultura i Deporte (ESKD) sr. Sithree van Heydoorn a tene un seremonia den kuadro di aseptashon di Krus di Mérito. E aseptashon di Krus di Mérito akí ta pa dos siudadano mashá spesial ku ta keda kondekorá riba 10 di òktober 2025. Ta trata di e nominadonan sra. Emily de Jongh-Elhage i sra. Lizanne Dindial.

Den kuadro di Dia di Outonomia 2025, i despues ku Konseho di Minister a bai di akuerdo ku e proposishon entregá pa Minister di ESKD sr. Sithree van Heydoorn a invitá e dos siudadanonan nominá pa e seremonia di aseptashon. E seremonia a tuma lugá na Fòrtí i a konta ku presensia di Minister van Heydoorn, nominadonan sra. Emily de Jongh-Elhage, sra. Lizanne Dindial i Direktor di Sektor di Kultura i Deporte sra. Lizette Sambo-Velder i den presensia di e sekretariado di komishon Krus di Mérito sra. Sonaline George i sr. Urlmar Concepcion. E nominadonan a keda sorprendí ku e proposishon di Minister van Heydoorn i a indiká ku pa nan ta un gran honor pa risibí esaki. Bishitá e link i por tuma nota di un biografia kòrtiku di e nominadonan: Biografia nominado 2025

Riba djabièrnè 10 di òktober 2025 na plasa Wilhelmina den un seremonia ofisial entre 9:00 pa 11:00 di mainta,

sra. Emily de Jongh-Elhage i sra. Lizanne Dindial ta keda kondekorá.

Pueblo di Kòrsou kompletu ta keda invitá pa presensia e bunita momentu kaminda ta duna honor na nos mes hendenan ku ta di gran balor pa nos nashon.

—
KOMUNIKASHON

MAS NOTISIA

Ministerio konserní: Enseñansa, Siensia, Kultura & Deporte