Manera tur aña riba 2 yüli próksimo riba Plasa Brion, Gobièrnu di Kòrsou ta bai entregá Krus di Mérito. E aña akí ta e di 23 edishon di Krus di Mérito.
Si bo ta un persona di 18 aña òf mas, di nashonalidat hulandes i ta biba na Kòrsou, bo por presentá un kandidato via e wèpsait di Krus di Mérito. Pa presentá kandidato, mester yena e formulario di Krus di Mérito ku algun dato di bo mes i informashon amplio i balioso di e persona ku bo ta presentá. E informashon di e kandidato mester ta di taip.
Subi www.krusdimerito.com; klek riba e opshon proponé un kandidato pa tuma nota di e kriterionan i despues klek riba postulá bo kandidato; Yena e formulario i “upload” tur sobrá dokumentu. Tambe por buska e formulario na Sektor di Kultura i Deporte na Bon Biní Business Center Schottegatweg Oost # 10.
E periodo pa entregá formulario ta 10 pa 31 di mart 2026. Pa mas informashon tuma kontakto ku Sektor di Kultura i Deporte via koreo – elektróniko krusdimerito@owcs.gov.cw òf na telefòn: 529-7369.
Duna rekonosementu na nos mes hendenan ta un gran aporte na nos patriotismo, e yabi pa logra e pais ku nos tur ke.
—
Sr. Sithree van Heydoorn
Minister di Enseñansa, Siensia, Kultura i Deporte
