Publiká riba 07 Ougùstùs 2017
Djaluna 7 di ougùstùs Obra Públiko ta kuminsá ku konstrukshon di un krusada elevá na altura di Kaya Muizenberg, Kaya Havana i Kaya Montevideo. E trabounan tin un durashon di dos siman i durante e periodo aki tin diferente desviashon di tráfiko pa tene kuenta kune den e área.
Segun e trabounan ta tuma lugá, e krusada lo no ta aksesibel pa tráfiko. Outomobilistanan ku ta trafiká den e área mester sigui e indikashonnan den forma di flecha pa yega na nan destinashon. Tráfiko ku ta bin for di Stadion di Suffisant lo mester pasa via Van Krimpenlaan i Kaya Belize. Tráfiko ku ta bin for di direkshon di Kaya San Juan lo mester pasa via Kaya Bogota.
Krusadanan elevá tin e proposito di hisa e seguridat den tráfiko. Pa e krusada aki tambe esei ta e kaso. Obra Públiko ta pidi outomobilistanan pa kore ku koutela den e área na momentu ku e trabounan ta tuma lugá durante dia. Si tur kos kana segun plan e trabounan ta finalisá den e di kuater siman di e luna di ougùstùs.
Via di e karta aki, Obra Públiko, kontratista CWM i Kuerpo Polisial Kòrsou ta pidi indulgensha pa eventual molèster pa e kambio temporal. Pa kualke pregunta tokante e proyekto por tuma kontakto ku Obra Públiko via e number 433-4104.
