Publiká riba 02 Yüli 2024
Djaluna 1 di yüli 2024, Kòrsou tabata di hubilo na momentu ku Minister di Hustisia, mr. Shalten Hato tabata e promé pasahero ku di forma ofisial a drenta via di e sistema biométriko na momentu ku e la hasi uso di Curaçao Express Pass. For di 25 di yüni ultimo, a inisiá ku un “sòft launch” na unda pasaheronan por a hasi uso di e sistema nobo aki. Un di e karakterístikanan ku ta hasi esaki e mihó úniko na mundu, ta e abilidat pa pre-prosesá pasahero promé ku nan yega na Aeropuerto Internashonal di Kòrsou. Atrabes di un esfuerso kordiná, pasahero por kompletá parti di e proseso di verifikashon di identidat riba distansia for di e kòmfòrt di su kas kual ta yuda pa aselerá su bishita ora e yega na Kòrsou. E abilidat di pre-prosesamentu aki ta permití pa un mihó maneho di data di pasahero, segurando un transishon mas suave através di vários chekpoint di e aeropuerto.
Kon Curaçao Express Pass ta Funshoná?
Turista ku ta biaha pa Kòrsou, mester yena e karta di imigrashon digital (https://dicardcuracao.com/dicard). Despues di yena e DI card, pasahero ku ta elegibel lo wòrdu pidi pa usa e aplikashon Airside i pa klik riba e link pa wòrdu manda na e servisio di Curaçao Express Pass den e aplikashon Airside.
Ora e pasahero a baha e aplikashon grátis Airside Digital Identity App, nan por kontinuá usá nan telefòn pa tuma un sèlfi, skèn e MRZ riba página di pasaporte, i lesa e chip NFC. E ta kompará e biométriko fasial i data di pasaporte pa konfirmá e identidat di e persona i despues ta krea un identidat digital ku ta wòrdu almasená solamente riba telefòn di e usuario. Airside ta usa teknologia desentralisá; ningun data personal ta wòrdu almasená riba server di Airside. E pasahero despues ta revisá e formulario fásil di komprondé aki i ta duna outorisashon pa kompartí e informashon aki ku ofisial di frontera di Kòrsou.
Na yegada, tur pasahero di UK, EU, US, i CAN, kuminsando for di 16 aña, ta elegibel pa usa e Curaçao Express Pass. Ora pasahero ta aserká eGates di Curaçao Express Pass, nan ta simplemente wak den e kámara. E sistema ta kompará na e momentu ei e imágen bibu ku e data biométriko ku ta almasená den nan dokumento di biahe elektróniko. Na momentu ku imigrashon verifiká esaki, e porta ta habri outomátikamente i ta permití e pasahero pa prosedé. E proseso aki ta dura den ménos ku algun sekònde pa kada pasahero. E solushon inovativo aki ta permití ku e pasahero por disfrutá di un eksperensia di identifikashon sin kontakto i sin mustra dokumento ora nan yega.
E programa di Curaçao Express Pass a lansá su promé fase 1 di yüli 2024; fase dos ta inkluí totèms pa guia digital, ku lo wòrdu inkorporá mas lat den aña, promé ku “high season” turístiko di Desèmber. E intenshon ta ku ketu bai lo kontinuá ku desaroyá e teknologia aki, pa asina oumentá efisiensia i permití inovashon, kual lo permití pasahero disfrutá di e teknologia aki, tantu na entrada di pais Kòrsou pero próksimamente na salida tambe, na momentu ku ta bandoná nos pais. E proseso aki ta diseñá pa ta rápido i efisiente, eliminando e tempu pasá na verifikashon manual di identidat. E integrashon di e teknologia ta sperá pa redusí i mehora e efisiensia general di fluho di pasahero den e aeropuerto.
Durante e seremonia na lansamentu di Curaçao Express Pass, Minister di Hustisia, Shalten Hato, Minister di Desaroyo Ekonómiko, Ruisandro Cijntje, Direktor di Curaçao Airport Holding, Wilhelmus Ignacio (CAH), i COO di Curaçao Airport Partners (CAP), Michael Hoenenberger a hiba palabra pa gradisí e esfuerso di mas di 80 persona ku a hasi posibel pa e promé app mundial aki por a ser lansá awe. Komo isla chikitu, no solamente nos a demostrá den Karibe, ni tampoko na Latino Amérika,pero a demostrá mundu kompletu, ku nos por a yega na e inovashon aki. Minister Hato a gradisí tantu Minguel Lei, di Vision Box i tambe Adam Tsao, CEO di Airside, pa nan kolaborashon den realisá Kòrsou su soño. Finalmente, Minister di Hustisia, a gradisí Priscilla Duin-Circkens, di Curaçao Airport Holding, ku a pone su kurpa kompletu bou di e proyekto aki i ku huntu ku Ministerio di Hustisia, sra. Oleana di EY, i tambe hinter e tim di trabou, a traha inkansablemente durante di 10 aña pa awe Kòrsou por ta bria ku e logro aki.
Pa mas informashon: Por chèk e video di instrukshon na e link aki: https://youtu.be/lBCCxS1fBY8?si=Jp7djbPWJm8u-k12
Por download e presentashon di ppt na e link aki: PRESS BRIEFING CEP Launch
Pa entrevista por tuma kontakto ku:
Minister Shalten Hato – Ministerio di Hustisia
Sr. Gerold Daantje – Ministerio di Hustisia
Sra. Priscilla Duin – Circkens – Curaçao Airport Holding
Sra. Elaine Oleana – Ernst & Young
