Notisia

ISM ISPS ILO MLC 2006 Internal auditor course:
Kurso di ouditoria interno pa empleadonan di Outoridat Marítimo di Kòrsou (MAC)

Willemstad – Outoridat Marítimo di Kòrsou ta responsabel pa barkunan seif i nabegashon limpi riba laman. Tin tratadonan internashonal ku tur barku tin ku kumpli kuné i MAC ta kontrolá esei. Staf i personal di MAC resientemente a sigui un kurso intensivo di ouditoria interno di 3 dia.

Durante di e kurso, partisipantenan a siña entre otro tokante e kontenido i interpretashon 3 komponente:

1. ‘International Safety Management’ (ISM) Code. ISM ta un kódigo kaminda ta ouditá tantu e kompania doño di barku i e barku mes, pa wak si nan sistema di manehá ta kuadra ku e kódigo.
2. ‘International Ship and Port Facility Security (ISPS) Code’. ISPS ta un kódigo ku ta wak kon ta atendé ku seguridat di e barku, su karga, i su tripulashon pa garantisá ku esaki ta kumpli ku e kódigo. 
3. ‘International Labor Organization’ (ILO) su Maritime Labour Convention (MLC) 2006. MLC 2006 ta e konvenio ku ta wak e kondishonnan laboral di e tripulashon esta si e kompania òf doño di barku ta kumpli ku stándartnan internashonal.

Similaridat i diferensianan entre e kódigonan aki tambe a bini dilanti durante di e kurso. Tambe partisipantenan a siña tokante sistemanan di maneho i maneho di riesgo. E prinsipionan i práktika di ouditoria tambe e keda presentá.

Durante di e training, representantenan di SOAW, Warda Kosta i tambe KTK tabata presente huntu ku staf i personal di MAC.

MAC ta e organisashon di Gobiernu di Kòrsou ku ta registrá, sertifiká i inspektá barkunan ku ta operá riba nivel internashonal i ta kontrolá aktividatnan marítimo den nos awanan. Tantu di nos mes barkunan (vlaggenstaat) i di barkunan stranhero (havenstaat). Nos ta chek si tur papelnan i sertifikadonan ta na òrdu i válido. Si nan no ta na òrdu MAC ta disidí si e barku ta wòrdu detené òf ta haña un tempu definí pa drecha e fayo(nan). MAC ta duna konseho na Minister di Tráfiko, Transporte i Planifikashon Urbano pa e por duna pèrmit pa aktividatnan marítimo tuma lugá den nos awanan teritorial.

Tareanan di MAC ta:

• Kontrolá barkunan ku ta registrá na Kòrsou i ku ta nabegá rònt mundu
• Kontrolá barkunan stranhero ku ta bishitá nos hafnan
• Kontrolá nabegashon di barku den nos awanan teritorial.
• Duna konseho riba pèrmit pa aktividatnan den nos awanan
• Investigashon i kombatimentu di desaster

Pa mas informashon tokante MAC, por bishita nan website http://www.maritimecuracao.org . Pa pregunta por yama òf whats app na 511-8582. Pa tur informashon i desaroyo di Ministerio di Tráfiko, Transporte i Planifikashon Urbano (VVRP) por bishita e website na www.vvrp.cw, facebook página MinisterieVVRP i instagram MinisterieVVRP.

MAS NOTISIA

Ministerio konserní: Tráfiko, Transporte i Planifikashon Urbano