Publiká riba 26 Febrüari 2018
Willemstad – Prinsipio di aña ta un periodo ku hopi ta esnan ku mester kùr nan vehíkulo pa despues sigui ku e proseso di kumpra belasting i seguro. Tin hopi hende ta sea lubidá òf neglishá di laga kùr nan vehíkulo. Kùr bo vehíkulo ta un obligashon ku kada ken ku ta disponé di un vehíkulo tin. Minister di Tráfiko, Transporte i Planifikashon Urbano, sra. Zita Jesus Leito ta boga pa un tráfiko sigur i p’esei ta urgí tur hende pa kùr nan vehíkulo na tempu.
Aña pasa un total di 42.944 vehíkulo a pasa dor di e proseso di kùr, for di kua 40.163 a pasa e revishon ku éksito. Na momento ku analisá e sifranan e kantidat di vehíkulonan, ku tur luna ta sali negativo for di e proseso di kùr, tòg ta bastante. Por ehèmpel na mart 2017 un total di 395 vehíkulo su estado tékniko no tabata 100%. Esaki tabata e sifra di mas haltu miéntras ku e kantidat di mas abou tabata na yüni 2017 ku 128 kaso. P’esei semper ta bon pa laga un mekániko revisá bo vehíkulo pa bo. Pasombra na momento ku kùr bo vehíkulo ‘af’, esaki ta eksigí èkstra gastu. Lo mester laga drecha e loke nan no ta bon na e vehíkulo, buska un sita nobo, i paga pa e proseso di “herkeuring”. Esaki ta kosta F 10,- si e tuma lugá den di 30 dia, i F.30,- despues di 30 dia.
Promé ku subi kaya e vehíkulo mester ta den bon kondishon téknikamente i p’esei mester pasa dor di e proseso di kùr. Promé ku bai kùr ta bon pa laga wak si por ehèmpel: brek, pitu, waipernan ta funshoná optimal. Esaki ta fasilitá e proseso i e chèns ta grandi ku ta pasa dor di e proseso di kùr fásil.
Ta bon pa regularmente chek e karchi di kùr pa sa presis ki temporada bo mester kùr bo vehíkulo i hasi esaki na tempu. Evitá problema i kùr bo vehíkulo na ora.
