Publiká riba 01 Òktober 2025
Willemstad – Lokèt di Pèrmit konhuntamente ku Asuntunan Públiko (Kranshi) di Ministerio di Maneho di Gobernashon, Planifikashon i Servisio Públiko (BPD) ta selebrá e promé aniversario di Lokèt di Komunidat situá na Sambil.
Nos ta felis pa kompartí ku 2 di òktober 2025, nos Lokèt di Komunidat a kumpli ku su promé aña di eksistensia. Riba 2 di òktober 2024 nos a habri nos unit na Sambil ku un selekshon di produktonan di Kranshi i di Lokèt di Pèrmit pa brinda servisio na komunidat bou di 1 dak. ‘Servisio di Kalidat, na 1 Lokalidat’. E inisiativa aki, ku a kuminsá komo un ‘pilot’, awor a demostrá di ta indispensabel den e servisionan di Gobièrnu. Nos a evaluá i tantu klientenan komo empleadonan ta satisfecho ku e servisio i esfera.
Nos ta anunsiá ku nos lo sigui brinda e servisio aki i pronto nos lo ampliá e kantidat di produkto i servisio ku nos ta ofresé, pasobra ‘Huntu nos tei, pa sirbi Abo!’. Servisio aksesibel i efisiente pa nos klientenan. Danki na tur empleado i Pueblo di Kòrsou pa e aseptashon, apoyo i konfiansa. Nos ta spera di por sigui konta ku boso.
Lokèt di Komunidat ta situá na Sambil (entrada Cas Abou)
Orario: djaluna pa djaweps di 09:00 – 16:00 or di atardi i djabièrnè 09:00 – 12:00 or di mèrdia
Pa mas informashon Lokèt di Pèrmit ta alkansabel via e siguiente kanalnan.
Number di telefòn: 433-3123
Whatsapp: 433-3127
Página sosial Facebook: Lokèt di Pèrmit
Página sosial Instagram: loket.di.permit
Lokèt Digital: https://loketdigital.gobiernu.cw/
Lokèt di Pèrmit ta situá na Saliña 127 Eurobuilding (Banda di Subway).
Orario: djaluna pa djaweps 08:00 – 15:00 or atardi i djabièrnè 08:00 – 12:00 or di mèrdia
